Prindërit e nxënësve të vrarë në Gllogjan kanë folur pas arrestimit të tre personave si të dyshuar për vrasjen e trefishtë më 26 nëntor.

Babi i Gentë Mustafaj, ka deklaruar për T7 se tani ndihet më i qetë nga këto arrestime të Policisë së Kosovës.

“Unë si prind i Gentës, prej pram jam tu e ni nifar lehtësimi, i falenderoj organet e shtetit që janë duke e zbardhur këtë rast, po presim me u zbardh ky rast”, ka deklaruar babai i nxënëses së vrarë, Florim Mustafaj.

Ai ka thënë se pret sa më shpejtë të zbardhet edhe i gjithë rasti.

“Kam qef sa ma shpejtë, me na i qel edhe neve zemrat, le t’merret drejtësia, atyne ju kena lanë”, ka shtuar Mustafaj.

Njësoj si Mustafaj po ndjehet edhe Beqë Hamzaj, babai i Ledion Hamzajt, një ditë pas arrestimit të tre personave.

“Tash si prind jam ma i qetë, se shteti i Kosovës është ka merret me këtë çështje, unë jam pak ma i qetë edhe do të qëndrojë deri në fund kështu”, ka deklaruar babai i nxënësit të vrarë, Beqë Hamzaj.

Hamzaj ndjehet i kënaqur nga puna e deri tashme e organeve të sigurisë në vend.

“Deri qetash çka ka punu shteti i Kosovës jam i kënaqur”, ka shtuar Hamzaj.

Gjykata Themelore në Pejë u ka shqiptuar masën e paraburgimit prej 30 ditësh tre të dyshuarve që u arrestuan të shtunën në lidhje me këtë rast.

GazetaDemos gjatë ditës ka raportuar edhe për reagimin e familjarit të të arrestuarve, i cili ka mohuar se familja e tij kanë qenë të përfshirë në këtë rast.