![](https://www.epokaere.com/wp-content/uploads/2022/03/FB_IMG_1647028255832.jpg)
Tahiri pas vizitës në Asamblenë Parlamentare: Aplikimi në Këshillin Evropian pa zhurmë por me shumë punë!
Shefi i Grupit Parlamentar të AAK-së, Besnik Tahiri po merr pjesë në takimin e Komitetit për Çështje Politike dhe Demokraci të Asamblesë Parlamentare të Keshillit të Evropës.
Deputeti i AAK-së u shpreh se në gjendjen momentale prioriteti i këtij institucioni është gjendja në Ukrainë.
“Vendet Evropiane janë të unifikuara në qëndrimet e veta për luftën në Ukrainë, por ende disi hezitojnë t’i thonë qendrimet qartë dhe saktë”, ka thënë Tahiri.
Ndërkaq, sa i përket procesit të anëtarësimit të Kosovës në Këshillin e Evropës, Tahiri ka theksuar se ende ka shumë punë që duhen kryer.
Ndër të tjera, Tahiri shpalosi disa sygjerime në lidhje me procesin e anëtarësimit në Këshillin e Evropës.
Postimi i plotë i Tahirit në “Facebook”:
Në Strasburg të Francës, në takimin e Komitetit për Çështje Politike dhe Demokraci të Asamblesë Parlamentare të Keshillit të Evropës, u diskutua për ‘sulmin e armatosur të Federatës Ruse ndaj Ukrainës’, me theks përgjigjen që Këshilli i Evropës duhet ta ketë.
Nga ky takim, dua t’i ndaj disa konstatime:
– Vendet Evropiane janë të unifikuara në qëndrimet e veta për luftën në Ukrainë, por ende disi hezitojnë t’i thonë qendrimet qartë dhe saktë;
– Kërkesa nga deputetë të vendeve të ndryshme për sa më shumë qartësi, disi tregon hezitimin që nuk do të duhej të ishte.
– Deputetët nga Ukraina duke folur në takim ma kthyen epokën e rëndë të luftës sonë të vitit 1999, kur kërkonim ndihmë, por ishim me besim të plotë në fitore. Mos të harrojmë 2.5 milionë refugjatë u deklaruan deri më tani!
– Raportuese u zgjodh norvegjezja Ingjerd Schou, nga partia konzervatore, lajm i mirë.
Ndërsa rreth anëtarësimit tonë në Këshillin e Evropës, ende ka shumë punë, më poshtë 5 pika/sugjerime:
1. Prioriteti i këtij institucioni është Ukraina dhe vetëm Ukraina;
2. Roli i Rusisë dhe vendeve aleate të saj janë jashtë ndikimit, pra tani për tani nuk kanë mundësi me na penguar;
3. Deklaratat se është momentumi i duhur për aplikim, duhet të studiohen seriozisht e mirë, me maturi, e jo me tifozëri. Sipas vlerësimit tim, nuk janë punët për deklarime pompoze, por për avokim strategjik e politikë ‘pa zhurmë’.
4. Urgjentisht duhet ta forcojmë me personel e kapacitete logjistike e buxhetore Konsulatën tonë në Strasburg.
5. Në prill (25-29) delegacioni ynë duhet të vijë këtu me plan konkret, deri atëherë mos të bëjnë shumë tweeta.
Kaq për sot nga Strasbourgu!