“Rusia duhet të përballet me drejtësinë për krimet e luftës në Ukrainë”

06 maj 2022 | 12:18

Organizata Amnesty International (AI)  ka bërë me dije se ka dokumentuar krime të shumta lufte të kryera nga forcat ruse në komunitetet përreth kryeqytetit ukrainas, Kiev, përfshirë edhe ekzekutime arbitrare, bombardime të zonave të banuara dhe raste të torturës.

“Llojet e krimeve të kryera nga forcat ruse që ne kemi dokumentuar përfshijnë edhe sulme të paligjshme dhe vrasje të qëllimshme të civilëve. Është thelbësore që personat përgjegjës, përfshirë zinxhirin komandues, të dalin para drejtësisë”, ka thënë sekretarja e përgjithshme e Amnesty International, Agnes Callamard.

Amnesty International ka njoftuar se ka mbledhur të dhëna dhe dëshmi në tetë qytete pranë Kievit, përfshirë edhe në Buça.

Pasi forcat ruse janë tërhequr nga Buça në muajin prill, në rrugët e kësaj qyteze janë gjetur trupa të pajetë, shumica e të cilëve kishin duart e lidhura pas shpine. Po ashtu në Buça janë zbuluar varreza masive.

Guvernatori i rajonit të Kievit, Oleksandr Pavlyuk, ka thënë se të paktën trupat e 1 mijë e 235 civilëve janë gjetur në këtë rajon.

Në raportin e Amnesty International është përshkruar vrasja në Buça e Yevhen Petrashenko, 53 vjeç, i cili ishte qëlluar për vdekje në kuzhinën e tij, teksa gruaja dhe fëmijët e tij ishin fshehur në bodrum. Ushtria ruse kishte lejuar gruan e tij, Tatiana, që të hynte në banesë, ku ajo e ka  gjetur trupin e pajetë të burrit të saj.

“Yevhen u gjet i vdekur në kuzhinë. Ai ishte qëlluar në shpinë. Trupi i pajetë i tij qëndroi në banesë deri më 10 mars, kur ne ishim në gjendje ta varrosnim në oborrin tonë”, citohet të ketë thënë Tatiana.

Në raportin e kësaj organizate është dokumentuar edhe vrasja e Leonid Bodnarchuk, 44 vjeç, i cili ishte duke ngjitur shkallët në momentin kur forcat ruse sulmuan me granatë.

Sipas Amnesty International ekzekutimet në Buça janë kryer nga pushkë të specializuara që përdoren nga disa njësi elite ruse.

Hulumtimi i Amnesty International po ashtu ka përshkruar bombardimet në qytetin e Borodijankës, ku të paktën 40 persona janë vrarë nga bombardimet që kanë shkatërruar tetë ndërtesa banimi.

Lajme të sponsorizuara

Të fundit
Kryeministri i Hungarisë, Viktor Orban, ka thënë se shteti i…