Ish-trajneri i klubit Prishtina, Miroslav Ciro Blazeviq, ka përkujtuar lojtarin legjendar, Fadil Vokrrin, në përvjetorin e katërt të vdekjes së tij, duke thënë se është i lumtur që ka pasur privilegjin ta stërvit lojtarin.

Kroati Blazeviq përshkroi Vokrrin si lojtar me shumë shkathtësi, si dhe një njeri human.

Blazeviq ishte trajner i Prishtinës, në kohën kur Vokrri ishte lojtar në klub.

“Kanë kaluar 4 vjet nga vdekja e papritur e Fadil Vokrrit, dhe ende e kujtoj shumë mirë popullaritetin e tij dhe dashurinë që publiku kultivoi për të edhe në kohën kur unë isha trajner i tij në Prishtinë. Aq i fortë, i shpejtë, i shkathët, me teknika dhe goditje të shkëlqyera, ai shtangu lehtësisht të gjithë mbrojtësit që u përpoqën ta ndalonin. Ai dinte gjithçka, të shënonte dhe të driblonte, dhe kishte goditje të shkëlqyera me kokë”, ka shkruar Blazeviq në një postim në “Facebook”.

“Megjithatë, ai nuk ishte vetëm një futbollist i talentuar, por edhe një qenie njerëzore. Një njeri human që pushtoi lehtësisht masat me tiparet e tij të karakterit”.

Ish-trajneri 87 vjeçar tha se ndjen kënaqësi për kohën që ka kaluar me Vokrrin, dhe se kurrë nuk do ta harrojë atë.

“Ai ishte shumë, shumë emocionues, dhe unë jam këtu, tani që e kujtoj atë dhe një nga aventurat më të bukura të jetës sime. I gjithë qyteti jetoi për klubin dhe për ta shpëtuar atë. Dhe sot, historia e asaj epoke të paharruar përcillet brez pas brezi, dhe edhe sot ndjej një kënaqësi të madhe për periudhën që kam kaluar me Fadil Vokkrin në Prishtinë. Unë kurrë nuk mund dhe nuk dua ta harroj atë”, u shpreh ai.

Tutje Blazeviq tregoi për kohën kur donte ta bindte Vokrrin që të bashkohej me klubin e Dinamo të Zagrebit, por që ylli shqiptar në fund zgjodhi Partizanin.

“Ajo për të cilën më vjen sinqerisht keq është që nuk arrita ta bind Vokrrinë të bashkohej me Dinamo në atë kohë. Partizani dhe Dinamo e kishin joshur me kontrata joshëse për dy vite, por në fund ai pranoi ofertën e Partizanit që ishte shumë më e mirë për të, sepse Dinamo nuk ishte aq i fuqishëm në atë kohë për ta përballuar financiarisht”.

“Për ta mbyllur këtë kujtim të trishtë të përvjetorit të sotëm: Fadil Vokrri ka qenë dhe do të mbetet një figurë historike e kohës sonë dhe jam i lumtur që pata privilegjin ta stërvitja!”, përfundoi Blazeviq.