Deputetja e Aleancës për Ardhmërinë e Kosovës (AAK), Time Kadriaj, ka kërkuar sa më shumë lobim për t’i bindur vendet skeptike për ta fituar liberalizimin e vizave, raporton EO.

Ndonëse kanë kaluar shumë vite që Kosova e pret dritën jeshile për liberalizim, deputetja opozitare thotë se kjo vazhdon të mbetet në vullnetin e vendeve veç e veç, teksa shpreson që një gjë e tillë të ndodhë sa më shpejt.

Kritika ka edhe ndaj Komisionit për Punë të Jashtme pasi, sipas saj, ka qenë pasive me vizita në shtetet skeptike.

“Janë bërë 4 vjet kur parlamenti evropian ka dhënë rekomandim pozitiv për liberalizimin e vizave dhe që gjithmonë është premtuar se do të ndodhë. Tash padrejtësisht 4 vjet ende po gjendemi në situatën e njëjtë pa liberalizim të vizave. Kemi shpresuar shumë në samitin e BE-së që do të ndodhë sepse Bashkimi Evropian po thotë që ka në agjendë Ballkanin perëndimor dhe në fakt ne kemi ngelë ende vendi më pro-evropian pa viza. Tash është në vullnetin e vendeve veç e veç. Edhe qeveria e dhe komisioni për Punë të Jashtme u dashtë me qenë më aktiv me vizita sistematike në të gjitha vendet te cilat janë skeptike në mënyrë që të lobojmë sado pak që të hiqet ai hezitim”, tha Kadriaj.