Kryetari i Aleancës për Ardhmërinë e Kosovës (AAK), Ramush Haradinaj është shprehur i shqetësuar se Kosova mund të shkojë në kollaps për shkak të krizës energjetike, e cila sipas tij është në prag.

Në një konferencë për media, bashkë me kryetarët e komunave të kësaj partie, Haradinaj ka thënë se institucionet dhe qeveria nuk janë serioze dhe s’kanë një plan sesi t’i qasen këtij problemi para dimrit që po vjen.

“Jemi dëshmitarë që inflacioni në vend është mbi 14 për qind dhe t’iu them të drejtën s’po shohim veprime konkrete të qeverisë. Qeveria jonë, ka bllokuar Ligjin e pagave dhe nuk po shihen veprime konkrete për ecjen para me këtë ligj. Të njëjtën kohë janë bllokuar edhe nisma të tjera si ajo për tërheqjen e një përqindjeje të mjeteve nga Trusti. Qeveria po i grumbullon paratë në arkën e shtetit, por s’po i nxjerr në qarkullim dhe nuk po i kthen në ekonomi që është shqetësim për Kosovën”, ka thënë Haradinaj, duke shtuar se qeveria nuk është duke bashkëpunuar me komunat.

“Qeveria ka kohë që s’po tregohet bashkëpunuese, por edhe ajo e përgjegjshme në raport me komuna. Ka pasur vonesa të jashtëzakonshme në ndarjen e buxhetit për komunat, ka probleme serioze e kontrata për kryerjen e punëve të ndryshme në komuna. AAK-ja ka vendosur të krijojë forumin e kryetarëve të komunave si një mekanizëm të adresimit të problemeve dhe temave të qeverisjes në nivel komunal në raport me qeverinë qendrore”, ka thënë Haradinaj.