![](https://www.epokaere.com/wp-content/uploads/2021/06/haradinaj-12.jpg)
Haradinaj tregon kur do të arrihet marrëveshja Kosovë – Serbi
Kryetari i AAK-së, Ramush Haradinaj ka folur për dialogun Kosovë-Serbi dhe mundësinë e një marrëveshje përfundimtare nga ky proces.
Ai tha se në vjeshtë, Kosova dhe Serbia do të udhëtojnë për në Shtëpinë e Bardhë për ta arritur këtë marrëveshje.
Të vetmen frikë, ai tha se e ka që presidenti i ShBA-së, Joe Biden bashkë me sekretarin Antony Blinken mund të jenë të zënë nga angazhimet e tyre, sidomos nga situata në Ukrainë, megjithëse shpreson që një çështje e tillë të futet në agjendën e tyre.
“E kanë mbështetjen time për ta arritur marrëveshjen, nëse bashkohemi pozitë-opozitë edhe Amerika me ne, do ta zgjidhim këtë problem dhe me njohjen reciproke do të ecim përpara drejt NATO-n dhe ta marrim njohjen nga 5-shja evropiane mos-njohëse”, tha ai.
Ai shtoi se takimi i delegacionit i Kosovës në Uashington bashkë me sekretarin Antony Blinken mund të jetë takimi i fundit, që i paraprinë marrëveshjes finale me Serbinë.
“Blinken mund të vijë edhe një herë para marrëveshjes në rajon. Ky ka qenë takimi i fundit, mundësia e fundit me marr përkrahjen e Amerikës me mbyllë çështjen Kosovë-Serbi. Ky është takimi i fundit para ftesës së Biden për marrëveshje. Pres angazhimin e fundit nga kjo administratë për Kosovën. Procesi do ta jep epilogun në vjeshtë. Unë besoj që Kosova dhe Serbia në Shtëpinë e Bardhë në vjeshtë do ta arrijnë marrëveshjen. Kam dëshirë me ndodhë, i jap përkrahjen”.
“Të vetmen tremë e kam që presidenti Biden dhe sekretari Blinken do të jenë të zënë. Frika është a mundemi me hy në agjendë. Kam shpresë që po, është interes i rajonit dhe krejt neve, por edhe i BE-së dhe ShBA-së”, shtoi Haradinaj në Klan Kosova.