15 qen endacakë sulmojnë mjeken nga Prishtina, kërkon ndihmë në QKUK
Një mjeke e cila punon në Qendrën Klinike të Mjekësisë Familjare në Prishtinë në pasditen e djeshme është sulmuar nga 15 qentë endacakë.
Rasti ka ndodhur pranë QKMF-së së Ambasadës së Zvicrës rreth orës 19:00
Paparaci mëson se bëhet fjalë për mjeken Kimete Surdulli.
Bashkëshorti i saj, Bujar Surdulli, ka folur për gjendjen e mjekes.
Surdulli ka thënë se menjëherë pas sulmit nga qentë endacakë ajo është dërguar në Qendrën Klinike Universitare të Kosovës, ku ka qëndruar për tri orë dhe ka marrë trajtimin e nevojshëm.
Pas sulmit Surdulli ka pësuar thyerje të dorës dhe disa lëndime të tjera trupore.
“Është sulmuar nga 15 qenë, edhe për rreth tri orë kemi qëndruar në spital, pasi që e ka thyer dorën dhe e ka në gips”, ka thënë Surdulli.
Ky nuk është rasti i parë që qentë endacakë i sulmojnë mjekët.
Në prill të këtij viti tre mjekë ishin sulmuar nga qentë endacakë në QKUK.
Nga këta tre, vetëm dy prej tyre kishin kërkuar trajtim në Klinikën Emergjente.
Komuna e Prishtinës ka krijuar rreth 18 pika ushqyese për qentë endacakë, të cilat i ka vendosur në disa lagje të Prishtinës për t’u ofruar qenve ushqim dhe për ta lehtësuar mundësinë që të dërgohen për vaksinim dhe sterilizim.