![](https://www.epokaere.com/wp-content/uploads/2022/08/greva-1.jpg)
Sindikalistët thonë se ndërprerja e grevës varet nga qeveria
Bashkimi i Sindikatave të Pavarura të Kosovës (BSPK), më 29 gusht ka ftuar Qeverinë e Kosovës që të reflektojë lidhur me realizimin e kërkesave të tyre, në mënyrë që të ndërpritet greva e nisur më 25 gusht.
Në grevë janë mësimdhënësit, edukatorët në kopshtet publike, shërbyesit civilë në institucionet lokale dhe qendrore të Kosovës.
Kërkesa kryesore e sindikatave të këtyre punëtorëve, drejtuar Qeverisë së Kosovës, është ndarja e nga 100 eurove për punëtorët, derisa të hyjë në fuqi Projektligji për pagat.
Nënkryetari i Këshillit Grevist, Ali Gashi, ka thënë se greva do vazhdojë deri në realizimin e kërkesave të sindikalistëve.
“BSPK-ja është jashtëzakonisht e interesuar që të negociojë me zyrtarët e qeverisë. Prandaj, i bëjmë apel ekzekutivit që të reflektojë që të gjendet një zgjidhje për të dyja palët ”, ka thënë Gashi për “Radion Evropa e Lirë”.
“REL”-i ka kërkuar përgjigje edhe zyra për informim e kryeministrit të Kosovës, Albin Kurti, lidhur me atë se a pritet ndonjë takim dhe zgjidhje me Këshillin Grevist, por deri më tani, nga qeveria nuk kanë kthyer përgjigje.
Gashi ka thënë se nëse qeveria nuk reflekton, greva nuk do të ndërpritet dhe nxënësit nuk do të fillojnë vitin e ri shkollor, që duhet të nisë më 1 shtator.
Nga Sindikata për Arsim kanë paralajmëruar se do të ketë grevë deri në realizimin e kërkesave të punëtorëve.
Ditë më parë, Ministria e Punëve të Brendshme e Kosovës ka hartuar Projektligjin për pagat.
Ky legjislacion duhet të kalojë fillimisht procedurat e konsultimeve paraprake e publike dhe, pas miratimit në qeveri e Kuvend, të publikohet në Gazetën Zyrtare të Kosovës.
Në projektligj, një kopje të të cilit e ka siguruar “Radio Evropa e Lirë” është thënën se ai hyn në fuqi tetë muaj pas publikimit në Gazetën Zyrtare.