![](https://www.epokaere.com/wp-content/uploads/2021/07/ldk-2.jpg)
LDK-ja këmbëngul në planin e tyre 10-pikësh: Kriza energjetike në vend po shkon duke u thelluar
Lidhja Demokratike e Kosovës (LDK) përmes një komunikate për media, ka kërkuar nga qeveria që ta pranojë planin e tyre dhjetëpikësh për përballjen me krizën energjetike.
“Kriza energjetike në vend po shkon duke u thelluar, ndërsa ne si LDK do të vazhdojmë pareshtur t’i bëjmë thirrje Qeverisë që të pranoj planin dhjetëpikësh, të cilin e vlerësojmë shpëtues për qytetarët”, është thënë në komunikatën e LDK-së
LDK-ja ka thënë se blloqet e KEK-ut “po bien në mënyrë të vazhdueshme si pasojë e keqmenaxhimit të qeverisë”.
“Si pasojë e keqmenaxhimit të qeverisë po bien edhe blloqet e KEK-ut në mënyrë të vazhdueshme, me ç’rast po bie edhe mirëqenia e qytetarëve deri në limitet e mbijetesës. Ende pa u rregulluar blloku ‘A5’, bie blloku ‘A3’, duke bërë kështu që KEK-u të mos prodhojë as gjysmën e kapacitetit të tij, ku 530 MWh janë jashtë prodhimit. Në këtë kontekst, i bëjmë thirrje Qeverisë që të pranoj planin tonë dhjetëpikësh dhe t’i shpëtoj qytetarët, sepse me qasjen e saj të deritanishme po e shpien vendin drejt katastrofës energjetike”, është thënë në këtë komunikatë.
Komunikata e plotë e LDK-së:
Qeveri pranoje planin tonë dhjetëpikësh dhe shpëto qytetarët nga katastrofa energjetike
Kriza energjetike në vend po shkon duke u thelluar, ndërsa ne si LDK do të vazhdojmë pareshtur t’i bëjmë thirrje Qeverisë që të pranoj planin dhjetëpikësh, të cilin e vlerësojmë shpëtues për qytetarët.
Si pasojë e keqmenaxhimit të qeverisë po bien edhe blloqet e KEK-ut në mënyrë të vazhdueshme, me ç’rast po bie edhe mirëqenia e qytetarëve deri në limitet e mbijetesës. Ende pa u rregulluar Blloku A5, bie Blloku A3, duke bërë kështu që KEK-u të mos prodhojë as gjysmën e kapacitetit të tij, ku 530 MWh janë jashtë prodhimit. Në këtë kontekst, i bëjmë thirrje qeverisë që të pranoj planin tonë dhjetëpikësh dhe t’i shpëtoj qytetarët, sepse me qasjen e saj të deritanishme po e shpien vendin drejt katastrofës energjetike.
Mos të harrojmë se këto reduktime të energjisë elektrike po ndodhin në pikë të verës, gjersa ditët më të ftohta po vijnë. Ndërkaq, bazuar në paaftësinë e dëshmuar të kësaj qeverie, pritet të zgjatet edhe orari i reduktimeve.
Ka kaluar më shumë se një vit nga kriza energjetike, ndërsa qeveria kishte kohë të mjaftueshme të përgatitej që dimri që po vjen të jetë më lehtë i përballueshëm për qytetarët, mirëpo ajo dështoi në ditët më të nxehta të vitit – ditët e verës, ku konsumi i energjisë është më i ulët.
LDK i kërkon qeverisë që të marrë masa dhe të pranojë planin dhjetëpikësh për përballjen me krizën energjetike.
I. Pagesa e menjëhershme e subvencioneve të premtuara prej 90 milion euro për çmimin e energjisë elektrike.
II. Riparimi i Bllokut A5 i Termocentralit Kosova A.
III. Krijimi i mekanizmave për furnizim me burime alternative për ngrohje me çmime të përballueshme për qytetarët.
IV. Përgatitja e planit të efiçiencës dhe kursimit të energjisë.
V. Negocimi i kontratave afatgjate për furnizim me energji.
VI. Zbritja e TVSH-së nga 8% në 0% për faturat e energjisë.
VII. Krijimi i subvencioneve të reja për qytetarët dhe bizneset.
VIII. Largimi i tarifave diskriminuese të ZRrE-së.
IX. Themelimi i bursës së përbashkët për energji Kosovë-Shqipëri.
X. Përgatitja e Strategjisë afatmesme për rritjen e kapaciteteve gjeneruese me gaz dhe energji alternative.