![](https://www.epokaere.com/wp-content/uploads/2022/08/Screenshot_20220831-174633_Gallery.jpg)
Shteti ua ndal pjesërisht pagat mësimdhënësve
Ministri i Financave, Hekuran Murati ka thënë se sot nuk janë ekzekutuar pagat e plota të mësimdhënësve.
Në një konferencë për media të mërkurën ka thënë se ekzekutimi i pagave në sektorin publik është bërë pjesërisht për muajin gusht, për shkak të vonesave në procesimin e listave të grevistëve.
Murati ka thënë se nuk janë ekzekutuar pagat e mësimdhënësve të regjistruar në komunat të cilat nuk i kanë dërguar listat e pagave të mësimdhënësve në Ministrinë e Financave. Vetëm komunat e drejtuara nga Lëvizja Vetëvendosje i kanë dërguar listat e pagave pranë MF-së.
“Sot është bëtë vetëm pjesërisht ekzekutimi i pagave, për shkak se procesimi dhe përgatitja e llogaritjes së pagave merr kohë. Mirëpo siç e dini që greva e deklaruar nga SBASHK-u dhe BSPK, ka kriju nevojën që të procesohen edhe llogaritjet nga ato organizata buxhetore që ndikohen nga greva e shpallur dhe marrë parasysh që sipas ligjit detyrimi i punëdhënësit gjatë kohës sa punëtori është në grevë, pezullohet, ne kemi marrë për detyrë që të përditësohen listat e pagave. Mirëpo meqenëse se përditësimi i listave të pagave nuk është arritur të bëhet me kohë për këto organizata buxhetore, ka qenë e pamundur që të procesohet edhe me pagat e tyre në ditën e sotme. Pra, janë procesuar vetëm për ato organizata buxhetore listat e të cilave janë përdituësuar”, ka thënë Murati.
Ministri ka deklaruar se është i bindur që të gjithë mësimdhënësit do të dalin në vendet e tyre të punës.
Ai ka ftuar prindërit që fëmijët e tyre të dërgohen në shkollë nesër, më 1 shtator.