Kryeministri i Kosovës, Albin Kurti, ka pritur në takim ambasadorin jorezident të Malajzisë në Kosovë, Dato Abdul Malik Melvin Castelino.

Me këtë rast, Kurti ka thënë se Republika e Kosovës është falënderuese për mbështetjen e vazhdueshme të Malajzisë, sidomos në anëtarësimin e Kosovës në organizata ndërkombëtare.

Në shërbim të partneritetit strategjik dhe avancimit të marrëdhënieve bilaterale, Kurti ka ftuar për vizitë në Kosovë, kryeministrin e Malajzisë dhe ka thënë se mirëpret edhe delegacionet e bizneseve malajzese të interesuara të investojnë në vendin tonë.

Duke shtuar se Malajzia i çmon marrëdhëniet me Republikën e Kosovës, ambasadori Castelino ia ka përcjellë Kurtit përshëndetjet e kryeministrit të Malajzisë, Ismail Sabri Yaakob, dhe e ka ftuar Kurtin për vizitë zyrtare në Malajzi.