![](https://www.epokaere.com/wp-content/uploads/2022/09/rrahman-jasharaj.jpg)
Jasharaj: Nagavci po e vazhdon luftën ndaj SBAShK-ut, të shtunën s’do ketë mësim
Kryetari i Sindikatës së Bashkuar të Arsimit, Shkencës dhe Kulturës (SBAShK), Rrahman Jasharaj, ka thënë se inati i ministres së Arsimit, Shkencës, Teknologjisë dhe Inovacionit (MAShTI), Arbërie Nagavci nuk po lejon që të gjendet një zgjidhje për zëvendësimin e orëve të humbura gjatë grevës. Sipas tij, edhe këtë të shtunë nuk do të ketë mësim.
Jasharaj është shprehur se kanë pritur nga ministrja Nagavci t’i ftojë në takim gjatë kësaj jave për të gjetur një zgjidhje, por nuk kanë marrë ftesë. Ai e ka cilësuar të dështuar mbajtjen e mësimit në disa shkolla të shtunën e kaluar duke thënë se 70 për qind e institucioneve arsimore i janë përgjigjur thirrjet sindikale.
Më tutje, Jasharaj ka thënë se nëse Nagavci dëshiron të mbajë inatin ndaj SBAShK-ut, atëherë të ftojë në takim Këshillin e Prindërve.
“Të shtunën e kaluar, raportet flasin se edhe pse 70 për qind e institucioneve arsimore e kanë respektuar nenin 34, ka pasur institucione arsimore që kanë shprehur një lloj gatishmërie për të punuar, por e shtuna e kaluar jo vetëm ne, por edhe prindërit e kanë vlerësuar si të dështuar, ngase ka pasur një mungesë të jashtëzakonshme të nxënësve. Prandaj Nagavci edhe nëse dëshiron ta vazhdojë inatin dhe luftën ndaj SBAShK-ut do të ishte mirë që së paku me Këshillin e Prindërve të ulët dhe të bisedojë. E kisha lut Nagavcin që t’i lejë inatet e tekat, greva më në fund u pezullua, ne jemi në proces mësimor dhe është e udhës në përgjithësi për ta stabilizuar në përgjithësi këtë sistem mësimor”, ka thënë Jasharaj për “Kosovapress”.
Jasharaj ka theksuar se nëse zëvendësimi i orëve do t’ju ishte lënë mësimdhënësve, atëherë do të bëhej e pamundura që të realizohej planiprogrami i këtij viti shkollor, mirëpo sipas tij, qasja e Nagavcit përmes urdhrave e kërcënimeve ka irrituar edhe më shumë ata.
Ai ka thënë se Nagavci është duke gabuar me qëndrimin e saj ndaj SBAShK-ut.
“Unë jam i bindur nga përvoja si mësimdhënës se po t’ua lenim mësimdhënësve në pavarësinë e tyre dhe t’i lusim që ata ta bëjnë të pamundurën që të realizojnë sa më shumë planprogramin e këtij viti arsimor, do të kishim suksese shumë më të mëdha, se sa me urdhra, me inspektorë, me kërcënime për heqje të mëditjeve, sepse kjo vetëm i irriton mësimdhënësit dhe nuk i duhet as qeverisë, MAShT-it një situatë si e shtunës së kaluar… Nagavci është duke gabuar me qëndrimin e saj, është duke vazhduar një luftë në mënyrë figurative ndaj SBAShK-ut. Asnjë vlerë nuk ka edhe po shkuan këtë të shtunë të gjithë punëtorët e arsimit, nëse nuk vijnë nxënësit, e shtuna do të shkojë kot dhe nuk do të kemi proces mësimor”, është shprehur Jasharaj.
Mësimdhënësit të cilët nuk iu bindën SBAShK-ut dhe mbajtën mësim të shtunën e kaluar, Jasharaj ka thënë se mund të jenë frikësuar nga kërcënimet e qeverisë për heqje të mëditjes.
Bashkimi i Sindikatave të Pavarura të Kosovës (BSPK), pjesë e së cilës është edhe SBAShK-u, kishte hyrë në grevë më 25 gusht dhe e ka pezulluar atë më 1 tetor. Kërkesat e tyre janë 100 euro për çdo muaj deri në hyrjen ne fuqi të Ligjit për paga. Greva mund të rikthehet në janar në rast se nuk plotësohen kërkesat.
Ndërsa MAShTI kishte vendosur për zëvendësim të orëve të humbura gjatë muajit shtator duke ndryshuar kalendarin shkollor, por me të s’u pajtuan as SBAShK-u, as prindërit e as komunat. Ata po refuzojnë që mësimi të zëvendësohet të shtunave, duke rekomanduar të gjenden zgjidhje tjera.