Qeveria e Republikës së Kosovës ka miratuar raportin për gjendjen ne shërbimin civil të Republikës së Kosovës për vitin 2017, përgatitur nga Ministria e Administratës Publike (MAP).

Pas miratimit në Qeveri, raporti është përcjell në Kuvendin e Kosovës për shqyrtim dhe aprovim.

Ministri i Administratës Publike, Mahir Yagcilar, ka njoftuar kabinetin qeveritar se numri i përgjithshëm i shërbyesve civil deri në fund të vitit 2017 është 18, 249.

Gjatë vitit 2017 janë punësuar gjithsej 723 nëpunës civil.

Në mesin arritjeve kryesore gjatë vitit 2017, ministri i Administratës Publike, Mahir Yagcilar, ka veçuar standardizimin e proceseve të punës në menaxhimin e burimeve njerëzore siç është: katalogu i pozitave, përshkrimet e detyrave të punës, krijimi dhe administrimi i proceseve të punës përmes Sistemit të Informacionit të Menaxhimit të Burimeve Njerëzore (SIMBNJ), etj.

Më tutje ministri Yagcilar ka deklaruar se aktualisht 40 për qind e shërbimit civil e përbëjnë femrat, duke bërë me dije se MAP-i në kuadër të planit të veprimit për zbatimin e strategjisë për modernizimin e administratës publike synon të rris këtë vlerë, sidomos në pozitat e larta drejtuese.

Sa i përket strukturës etnike, komunitetet joshumicë përbëjnë 11.5 për qind të shërbimit civil.

Gjatë vitit 2018 ë Qeveria e Kosovës pritet të miratojë pakon e ligjeve të reformës së administratës publike, që përbëhet nga Ligji për Administratën Shtetërore, Ligji për Zyrtarët Publik, si dhe Ligji për Pagat.