![](https://www.epokaere.com/wp-content/uploads/2022/12/vuciq-2.jpg)
Vuçiq: Situata është shumë e rrezikshme – në janar vijnë ndërkombëtarët në Beograd për marrëveshjen me Kosovën
Presidenti i Serbisë, Aleksandar Vuçiq, tha se pret që në gjysmën e parë të muajit janar në Beograd të vijnë përfaqësues ndërkombëtarë, të cilët do të insistojnë në nevojën që Serbia dhe Kosova të arrijnë një marrëveshje për normalizimin e marrëdhënieve.
“Unë pres që burra dhe gra të mëdha nga bota të vijnë tek unë dhe të më thonë se duhet të arrijmë një marrëveshje. Ne po përballemi me një kohë të vështirë për Kosovën dhe Metohinë, por do të luftojmë”, tha ai.
Vuçiq tha se për të është e rëndësishme të përmbushën garancitë e bashkësisë ndërkombëtare në bazë të të cilave serbët në veri të Kosovës i hoqën barrikadat nga pikat kufitare drejt Serbisë.
“Situata është shumë më e rrezikshme dhe më e vështirë se sa mendoni”, tha Vuçiq pasi serbët lokal mbajtën të bllokuara rrugët në veri të Kosovës për 20 ditë.
Ai ka deklaruar se i frikësohet papërgjegjshmërisë së disa përfaqësuesve të bashkësisë ndërkombëtare dhe “arrogancës” së autoriteteve të Prishtinës.
Presidenti i Serbisë, Aleksandar Vuçiq, priti në një takim, Nikola Nedeljkoviq nga Beogradi i cili u lirua më 28 dhjetor. Nedeljkoviq u dënua me tetë muaj burg për nxitje të urrejtjes etnike. Gjykata e Apelit në Prishtinë më pas ia uli dënimin në gjashtë muaj.
Nedeljkoviq u arrestua më 28 qershor derisa serbë nga anë të ndryshme të Kosovës dhe Serbisë po festonin atë që njohet si beteja e Kosovës në Gazimestan afër Obiliqit.
Tre oficerë të policisë së Kosovës, duke vepruar si dëshmitarë, akuzuan Nedeljkoviqin se kishte bërtitur “Vriteni Shqiptarin” gjatë ngjarjes.
Vuçiq ka deklaruar se Nedeljkoviq vetëm ka bërtitur “Serbia” dhe ka bërë një fotografi me një flamur ku shkruhej “Nuk ka dorëzim”.
Nedeljkoviq tha se nuk urren askënd, por se e do dhe e respekton vetëm vendin e tij.
Ai pranoi ofertën e Presidentit të Serbisë për t’u angazhuar në punë humanitare në kuadër të Zyrës së Qeverisë së Serbisë për Kosovën pasi kishte kaluar gjashtë muaj burg në Prishtinë.