![](https://www.epokaere.com/wp-content/uploads/2023/01/A67A4E80-5E0F-4169-843A-893BFC1C6F6A.jpeg)
Kërcet dajaku në Burgun e Dubravës, dy të burgosur rrahin shokun e qelisë
Përleshjet mes të burgosurve në qendrat korrektuese në vendin tonë nuk janë edhe aq të rralla. Raste të tilla e incidente të tjera, siç është ikja e të dënuarve janë goxha të shpeshta, sidomos në Burgun e Dubravës.
Përveç rrahjeve, shpesh të burgosurit kapen edhe me drogë, që nuk dihet se si përfundon brenda, raporton Sinjali.
Pa kaluar disa javë nga rasti i fundit, edhe mbrëmë pak para mesnatës ndodhi një rrahje në këtë burg. Këtë herë janë të përfshirë të burgosurit e një qelie, dy prej të cilëve iu janë vërsulur një të burgosuri tjetër, të cilin e kanë sulmuar fizikisht.
Sipas informacioneve të para, të dënuarit S.M., dhe S.B., e kanë rrahur shokun e qelisë, duke e goditur me grushte, me ç’rast i kanë shkaktuar lëndime trupore.
Si masë parandaluese që të mos eksalohet situata, oficerët kanë ndërhyrë, ndërsa i burgosuri që u sulmua ka marrë trajtim mjekësor. Në anën tjetër është njoftuar edhe Prokurori i Shtetit, që ka urdhëruar inicimin e rastit si “Lëndim i lehtë trupor”.