Në startin e këtij sezoni të Formula 1 do të jetë edhe piloti britanik Lewis Hamilton, shtatë herë kampion bote, që do të garojë makinën Mercedes. Ai është një pilot që ka kaluar shifrën e 300 garave në këtë sport.

Statistikat tregojnë se pilotët, pasi arrijnë kuotën e 300 garave, nuk fitojnë dot më, tabu që këtë vit synon ta thyejë Hamiltoni.

“I di aftësitë e mia dhe të makinës time, ndaj mendoj se mund t’ia dal mbanë”, ka thënë Hamilton, që mban mjaft rekorde në këtë sport. “Ju garantoj se në Formula 1 nuk ka pasur kurrë më parë një pilot si unë”, u shpreh më tej Lewis Hamilton, që përgatitet për një tjetër sezon të vështirë, duke qenë se Mercedes nuk është favorite.

Gjashtë janë pilotët që kanë kaluar kuotën e 300 garave në Formula 1: Fernando Alonso, Kimi Raikkonen, Michael Schumacher, Rubens Barrichello, Lewis Hamilton e Jenson Button (Vettel 299 gara), por pasi kanë arritur këtë shifër nuk kanë fituar dot më. Nga kjo gjashtëshe, vetëm Barrichello nuk është shpallur dot kampion bote.