Kryeministrja e Serbisë, Ana Brnabiq, ka deklaruar se administrata e tanishme amerikane është e gatshme të dëgjojë qëndrimin e Serbisë në lidhje me zgjidhjen e çështjes së Kosovës.

“Shumë herë kam pasur përshtypjen se kam para vetes një bashkëbisedues që nuk është i gatshëm të dëgjojë – sikur të flasësh me murin. Tani kemi bashkëbisedues që është i gatshëm të dëgjojë”, ka deklaruar Brnabiq për Radio-Televizionin e Serbisë.

Duke komentuar synimin e Britanisë së Madhe që të mos e fusë Kosovën në planin e punës gjatë kryesimit të këtij vendi me Këshillin e Sigurimit të OKB-së, në gusht, Brnabiq ka vlerësuar se fjala është për qëllim të pasinqertë politik.

“Realisht nuk ekzistojnë shumë gjëra që mund t’i bëjmë direkt, por do të vazhdojmë luftën diplomatike. Kombet e Bashkuara do të duhet të diskutojnë për situatën në Kosovë, siç kanë bërë deri më tash”, ka thënë Brnabiq./rel/