![](https://www.epokaere.com/wp-content/uploads/2023/05/246372640_10158862827912961_6996517113702134799_n-2-1024x610-1.jpg)
Abazi i LV-së bën thirrje të votohet kandidati i Berishës dhe Metës për kryetar të Tiranës
Aktivisti i Lëvizjes Vetëvendosje dhe ish-kandidati për deputet në Kuvendin e Shqipërisë, Boiken Abazi, e ka bërë një shkrim befasues në “Facebook” ku ka shprehur mbështetje për kandidatin e Sali Berishës dhe Ilir Metës për Tiranën.
Abazi pritej që të mbështeste Arlind Qorin e Lëvizjes Bashkë, por megjithatë nuk e ka bërë një gjë të tillë.
Abazi ka kërkuar nga qytetarët e Tiranës që të dalin në votime edhe nëse nuk kanë për kë të votojnë.
“Në shumicën e zgjedhjeve, partia në pushtet përfiton nëse pjesëmarrja në votime është e ulët. Duke patur pushtetin, e ka më të lehtë organizimin në terren për të nxjerrë bazën e saj në votime”, ka shkruar Abazi.
Megjithëse, ai ka lënë të hapur mundësinë që të ketë manipulime në zgjedhje, dhe po ashtu se kandidatët nga partitë e mëdha mund të mos sjellin ndryshime domethënëse.
Në këtë kontekst, ai ka kërkuar që të votohet Belind Këlliçi, kandidati i PD-së (Partisë Demokratike) dhe PL-së (Partia e Lirisë) për kryetar të Tiranës.
“Vota për kryetar: Belind Këlliçi, si mundësi për të çbetonizuar sundimin 10 vjeçar mbi Shqipërinë”, ka shkruar Abazi.
Arlind Qori duke shpalosur kandidaturën e tij kishte thënë se Albin Kurti kishte qenë model për të.
Ai ka mbajtur në të kaluarën pozitën e drejtorit ekzekutiv të VV-së në Shqipëri, por tash besohet të jetë aktivist i thjeshtë pas dëshpërimit në zgjedhjet e prillit 2021.