Kryetari i Parlamentit të Austrisë, Wolfgang Sobotka, ka thënë se përparimi që ka bërë Kosova në vitet e fundit është mbresëlënës.

Ai në një konferencë të përbashkët me kryetarin e Kuvendit, Glauk Konjufca, ka thënë se marrëveshja e Ohrit ndërmjet Kosovës e Serbisë është shumë e rëndësishme.

Madje sipas tij, nëse Kosova e do anëtarësimin në Bashkimin Evropian (BE) duhet ta luftojë korrupsionin, raporton “EO”.

“Për mua është vizita e dytë në Kosovë, një shtet mik me një histori kaq të madhe, në një shtet me shumë përvoja të gjatë historike që rrugën e ka në integrim në BE. Kemi shkëmbyer edhe administratat tona. Një gjë duhet të jetë e qartë se mirëqenia e mirë dhe sundimi i ligjit është bazë e demokracisë. Jemi investitori i katërt më i madh këtu në Kosovë”.

“Unë mendoj se atë Kosova e ka arritur vitet e fundit vërtet është mbresëlënëse. Marrëveshja e Ohrit është shumë e rëndësishme. Austria në këtë aspekt mund të jetë një shembull për Kosovën”.

“Integrimi Evropian fillon me kërkesën për anëtarësim, këtë Kosova e ka bërë, mendoj që nëse luftohet korrupsioni, kemi një zhvillim pozitiv para vetës. Kosova luan një rol të rëndësishme për ne edhe në të ardhmen”, ka thënë kryeparlamentari austriak.