Kryetarja e Parlamentit Evropian (BE), Roberta Mecola, ka thënë se Ballkani Perëndimor i përket Bashkimit Evropian (BE) dhe se kjo është një formulë fituese si për BE-në ashtu edhe për rajonin.

Ajo ka theksuar se bashkëpunimi në mes të Ballkanit Perëndimor dhe ndërlidhja e tyre janë kyçe. Vendet e rajonit, siç ka thënë Mecola, duhet të ndërmarrin hapa drejt zgjidhjes së çështjeve të hapura dypalëshe.

“Ballkani Perëndimor i përket Bashkimit Evropian. Është një formulë fituese si për BE-në ashtu edhe për rajonin. Rruga drejt anëtarësimit në BE është një mjet i fuqishëm për reforma, për ndryshime që sigurojnë demokracinë, sigurinë dhe prosperitetin”, ka shkruar Mecola në “Twitter”.

Nëpërmjet një video-mesazhi, ajo ka kujtuar se vendet e Ballkanit Perëndimor kërkuan përshpejtimin e procesit të anëtarësimit.

“Ju dëgjuam me zë të lartë dhe qartë. Kjo po zgjat shumë, por gjërat ende po ecin përpara. Bota po ndryshon dhe BE-ja po ndryshon bashkë me të. Ndër arritjet e fundit është miratimi i statusit të kandidatit për Bosnjën dhe Hercegovinën, dhe se qytetarët e Kosovës nuk do të duhet të aplikojnë më për viza për të udhëtuar në zonën Shengen, por edhe Ballkani Perëndimor duhet të vazhdojë t’i përmbahet kritereve të anëtarësimit dhe të ndërmarrë hapa vendimtarë drejt zgjidhjes së çështjeve të hapura dypalëshe. Bashkëpunimi ndërmjet vendeve të Ballkanit Perëndimor është kyç. ndërlidhja përmes infrastrukturës, teknologjisë, digjitalizimit, e gjithë kjo do të krijojë më shumë siguri”,  ka thënë Mecola.

Më tutje, ajo ka thënë se perspektiva e anëtarësimit në BE shërben si një nxitje e fortë për të çuar përpara reformat që janë kyçe për përmirësimin e qeverisjes, sundimin e ligjit dhe promovimin e lirisë së medies.

“Në rrugën drejt integrimit dhe reformës evropiane, më lejoni t’ju them se Parlamenti Evropian qëndron pranë atyre që duan t’i bashkohen projektit tonë të madh evropian të paqes dhe prosperitetit”, ka thënë Mecola.