Kryeministri i Shqipërisë, Edi Rama është duke marrë pjesë në samitin e Këshillit të Evropës që është duke u mbajtur në Islandë.

Rama fjalën e tij në këtë samit e ka nisur duke sjellë në vëmendje gjykimin e padrejtë që është duke iu bërë liderëve të Ushtrisë Çlirimtare  të Kosovës (UÇK) në Hagë, Hashim Thaçit, Kadri Veselit, Rexhep Selimit dhe Jakup Krasniqit.

“Kërkoj ndjesë paraprakisht sepse më duhet të bëj një rrëfim jo fort të këndshëm. Si shqiptar është e pamundur për mua të shmang heqjen e paraleleve midis Ukrainës e presidentit Zelensky dhe Kosovës e presidentit Thaçi. Sot në këtë samit të Këshillit të Evropës nuk rri dot pa kujtuar se padrejtësia kundrejt luftës çlirimtare të Kosovës dhe udhëheqësit të saj Hashim Thaçit, nisi saktësisht në Këshillin e Evropës nën ndikimin dashakeq të ish-anëtarit të asaj kohe të këtij këshilli, Federatës Ruse. Presidenti i Kosovës ose si dikush i quajtur Joe Biden iu referua si George Uashingtoni i Kosovës, gjykohet tanimë nga një gjykatë e veçantë e ngritur dhe e themeluar nga bota demokratike, por e mbështetur në një raport të 2011 të Këshillit të Evropës i cili në mënyrë djallëzore u sponsorizua nga përfaqësuesit e partisë së Vladimir Putinit në asamblenë e Këshillit të Evropës”, ka thënë Rama në tryezën e rrumbullakët me temë “Përballja me sfidat e reja dhe në zhvillim të të drejtave të njeriut –  e ardhmja është këtu”.

Në këtë kontekst, kryeministri Rama ka theksuar akuzat ndaj liderëve të UÇK-së janë propagandë djallëzore që zanafillën e ka në Rusi. Ndër të tjera, Rama ka thënë se raporti i Dick Martyt ishte bërë për ta njollosur imazhin e Shqipërisë dhe të Kosovës.

Duke komentuar procesin gjyqësor në Hagë, Rama ka bërë një krahasim në mes të Hashim Thaçit dhe presidentit të Ukrainës, Volodymyr Zelensky.

“Akuza tërësisht të pabazuara të trafikimit të organeve njerëzore u ngritën atëherë si pikënisja e një fushate kriminale njollosjeje të Shqipërisë dhe të Kosovës dhe kur dëgjova propagandën e Kremlinit të flasë për trafikimin e organeve njerëzore nga neo-nazistët në Donbas, mu duk sikur pashë presidentin Zelensky 10 vjet më vonë gjykuar nga një gjykatë e veçantë ngritur mbi të njëjtat akuza absurde. Ndjesë për këtë çelje brutalisht jokonvencionale që mund t’ju duket sikur thyen në copa atë piano ku në mënyrë të mrekullueshme u luajt kënga ‘Ave Maria’ nga mikpritësit tanë, por është tejet shkurajuese të dish që situata shqetësuese ku përfshihet presidenti Kosovës, Ushtria Çlirimtare e Kosovës e pati zanafillën brenda Këshillit të Evropës”, ka thënë Rama.

Kryeministri shqiptar në fjalimin e tij nuk është ndalur me kaq. Ai ka thënë se Këshilli i Evropës e ka për detyrim moral që ta rishikoj çdo gabim në raport me liderët e UÇK-së.

“Do të isha fajtor po të mbetesha i heshtur e të mos flisja sot këtu e të thoja sa vijon, se asambleja e Këshillit të Evropës ka detyrimin moral të korrigjojë çdo gabim dhe në këtë rast duhet t’i hapë rrugën tërheqjes mbrapshtë  raportit që në mënyrë të rreme etiketoi Shqipërinë si bazë për trafikimin e dyshuar të organeve lehtësuar nga UÇK. Të refuzosh të përballesh me të vërtetën sot do të ishte më keq sesa të bëhej ky gabim i rëndë 12 vjet më parë kur shumë votuan mes sy mbyllur atë raport të turpshëm në mirëbesim. Sigurisht sot situata ka ndryshuar. Rusia nuk është më një anëtare e këtij Këshilli edhe pse numri i rusëve që vazhdojnë të punojnë për Këshillin e Evropës është mjaft mbresëlënës dhe falë Zotit uniteti i bashkësisë demokratikë të Këshillit në mbështetje të luftës çlirimtare të Ukrainës dhe presidenti Zelensky është i jashtëzakonshëm”, ka thënë Rama, duke hedhur akuza në drejtim të Rusisë për luftën në Ukrainë.

“Shqipëria kurrë nuk ka pasur iluzione për natyrën e regjimit të Moskës dhe marrëdhënia jonë me Moskën ka qenë joekzisutese qysh prej vdekjes se Josif Visarionoviç  Stalin. Mos më kërkoni të shpjegoj si e pse, se do më duhej më shumë kohë se ç’iu desh udhëtimit tonë për në Islandë. Qysh prej fillimit të luftës popullariteti i Vladimir Putinin është luhatur në Shqipëri nga 0.7 për qind në 1.2 për qind. Shqipëria është mjaft e vogël për të ndikuar fatet e një lufte kaq vendimtare për të ardhmen e Evropës dhe të botës, por çdo gjë të vogël që kemi bërë për Ukrainën e kemi bërë me mirënjohjen më të thellë ndaj qëndresës ukrainase. Kjo është arsyeja pse gjëja më e bukur që ne shqiptarët do të marrin nga ky samit, kaq i mire organizuar nga mikpritësit tanë islandezë. Faleminderit Katrinë, faleminderit Islandë për atë që çka bëtë në mënyrë kaq të vendosur dhe kurajoze duke shkundur statusquo-në e duke e përshirë Kosovën më së fundi në këtë komunitet të madh, pra është bindja e të të gjithëve këtu e shprehur në mënyrë kaq elokuente nga disa kolegë. Nuk është presidenti Zelensky që duhet të na falënderojë, por ne që duhet të falënderojmë Ukrainën për të atë që po bën për të gjithë ne e për Evropën tonë të dashur “, është shprehur Rama.