Nesër (e mërkurë), Qeveria e Shqipërisë dhe ajo e Kosovës do ta mbajnë mbledhjen e radhës në Gjakovë.

Ky do të jetë takimi i parë dy kryeministrave, Albin Kurti dhe Edi Rama, pas propozimit të draftit për Asociacionin e komunave me shumicë serbe nga ky i fundit.

Sipas agjendës, takimet do të nisin në ora 11:00, kur edhe pritet të mbërrijë delegacioni i Qeverisë së Shqipërisë në vend. Ndërkohë, hapja e sesionit plenar të mbledhjes së dy qeverive Kosovë – Shqipëri do të bëhet në ora 11:30 në Bibliotekën e qytetit, në Gjakovë.

Në orën 12:40 do të bëhet fotoja e përbashkët e dy qeverive, ndërsa në 12:45 në Teatrin e qytetit “Hadi Shehu” do të bëhet nënshkrimi i marrëveshjeve ndërqeveritare.

Marrëveshjet që pritet të nënshkruhen janë këto:

Memorandumi i mirëkuptimit për parandalimin e ekstremizimit të dhunshëm dhe luftën kundër terrorizmit

Deklarata e përbashkët për forcimin e bashkëpunimit në fushën e sigurisë

Marrëveshja për bashkëpunimin në lehtësimin e procedurave në pikat e inspektimit kufitar për produktet me origjinë jo shtazore

Marrëveshja e bashkëpunimit në fushën fitosanitare

Marrëveshja e bashkëpunimit në fushën e arsimit të lartë dhe kërkimit shkencor (ndarja e bursave)

MOU “për realizimin e olimpiadës së përbashkët në lëndën e Gjuhës Shqipe, për Klasat e 9-a, në arsimin parauniversitar”

Marrëveshja për shkëmbimin e përvojave lidhur me pjesëmarrjen në vlerësimet ndërkombëtare të nxënësve dhe zhvillimin profesional të mësuesve

Marrëveshja për njohjen e së drejtës së ushtrimit të profesioneve të avokatit dhe ndërmjetësit në zgjidhjen e mosmarrëveshjeve

Protokolli shtesë i marrëveshjes së bashkëpunimit lidhur me ofrimin e shërbimeve shëndetësore

Memorandumi i bashkëpunimi në fushën e inspektimeve

Marrëveshja e bashkëpunimit në fushën e teatrit

Memorandumi i mirëkuptimi midis MSHMS dhe MINT

Marrëveshja teknike në lidhje me “Bashkëpunimin në Fushën e Mjekësisë Ushtarake”

Memorandumi i bashkëpunimit në lidhje me “lehtësimin e procedurave të tranzitit të kalimit të mallrave ushtarake për qëllime dhe nevoja të Republikës së Kosovës dhe Republikës së Shqipërisë”.