Sekretari i përgjithshëm i NATO-s, Jens Stoltenberg, dhe presidenti i Malit të Zi, Jakov Millatoviq, kanë ftuar Kosovën dhe Serbinë që të ulin tensionet mes tyre dhe të përqendrohen në kalimin e kësaj situate përmes dialogut.

Këto komente ata i kanë bërë në Bruksel gjatë vizitës së parë të presidentit të ri të Malit të Zi, Jakov Millatoviq në selinë e NATO-s, ku është takuar me Stoltenbergun, me të cilin ka biseduar edhe për situatën në Kosovë.

Stoltenbergu ka thënë se pas rritjes së tensioneve në veri të Kosovës, NATO ka shtuar praninë e saj dhe përmes misionit të saj paqeruajtës në Kosovë, KFOR, angazhohet për të siguruar një mjedis të sigurt për të gjithë.

“I ftoj palët të ulin tensionet dhe të kthehen në dialogun e ndërmjetësuar nga BE-ja. Kjo është kyçe për qetësinë në Kosovë dhe për stabilitetin e gjithë rajonit”, ka thënë shefi i NATO-s.

Stoltenbergu është shprehur se aleanca ushtarake perëndimore mirëpret përpjekjet e BE-së për të shtensionuar situatën në Kosovë.

Me qëllim që të shtensionojë situatën, BE-ja më 22 qershor do të mbajë takime në Bruksel me liderët e Kosovës dhe Serbisë.

“Situata në Kosovë dëshmon se prania e NATO-s është e rëndësishme. Ne do të jemi besnikë ndaj mandatit që kemi sipas rezolutës së OKB-së dhe kemi rritur praninë tonë në Kosovë si përgjigje ndaj rritjes së sfidave të sigurisë. Prania jonë është për të siguruar lirinë e lëvizjes dhe mjedisit të sigurt për të gjithë qytetarëve në Kosovë. Në këtë drejtim, ne mbështesim edhe dialogun [midis Kosovës dhe Serbisë] dhe ftojmë palët që të përmbahen nga veprimet e njëanshme të cilat mund të përshkallëzojnë situatën”, ka thënë ai.

Ndërsa presidenti i Malit të Zi, Jakov Millatoviq, ka thënë se për shtetin e tij stabiliteti i rajonit të Ballkanit Perëndimor ka një rëndësi të veçantë dhe angazhimi i përbashkët i NATO-s dhe BE-së e forcon sigurinë e tërë rajonit.