Presidenti turk Tajip Erdogan dhe kryeministri izraelit Benjamin Netanyahu u takuan për herë të parë personalisht të martën, një moment historik pasi dy vende po përmirësojnë ngadalë lidhjet e tensionuara nga mosmarrëveshjet mbi politikat ndaj palestinezëve.

Lajmi u bë i ditur nga agjencitë “Reuters” dhe “The Times of Israel”.

Udhëheqësit, të cilët zhvilluan bisedime gjatë Asamblesë së Përgjithshme të Kombeve të Bashkuara të nivelit të lartë, ranë dakord të vizitojnë së shpejti vendet e njëri-tjetrit, thuhet në një deklaratë nga zyra e Netanyahu-t.

Televizioni më i vlerësuar i Izraelit “Channel 12” tha se Erdogan mund të kërkojë të shënojë 100-vjetorin e republikës turke muajin e ardhshëm me një pelegrinazh në një xhami të madhe të Jerusalem-it.

Marrëdhëniet midis ish-aleatëve u përkeqësuan pasi forcat izraelite vranë 10 turq në një bastisje të vitit 2010 në një anije aktiviste pro-palestineze që u përpoq të thyente bllokadën e saj në Rripin e Gaza-s, i cili drejtohet nga islamistët e Hamas-it të sanksionuar në Perëndim.

Ankaraja zytare dëboi ambasadorin e Izrael-it, një veprim i ndryshuar në vitin 2016, por u përsërit dy vjet më vonë për vrasjen e dhjetëra palestinezëve që morën pjesë në protestat e dhunshme në kufirin e Gaza-s.

Izrael-i, i cili ishte ankuar në pritjen e liderëve të Hamas-it nga Ankaraja, dëboi reciprokisht të dërguarin e Turqisë në vitin 2018.

Një vizitë në Turqi nga presidenti izraelit Isaac Herzog në mars 2022, e ndjekur nga vizitat e të dy ministrave të jashtëm, ndihmoi në afrimin diplomatik.

Erdogan dhe Netanyahu diskutuan tema politike, ekonomike dhe rajonale, si dhe çështjen izraelito-palestineze, tha Presidenca turke në një postim në platformën e mediave sociale X.

Presidenti turk i tha Netanyahu-t se të dy vendet mund të bashkëpunojnë për energjinë, teknologjinë, inovacionin, inteligjencën artificiale si dhe sigurinë kibernetike, tha presidenca.

Energjia është shfaqur si një fushë kryesore për bashkëpunim potencial.

“Në takim u diskutuan mundësitë për bashkëpunim energjetik kryesisht në fusha si kërkimi, prodhimi dhe tregtia e gazit natyror”, tha ministri turk i Energjisë Alparslan Bayraktar, i cili mori pjesë, raporton “Reuters”.

Turqia filloi një ofensivë në vitin 2020 për të riparuar lidhjet me rivalët e larguar, duke bërë hapa drejt Egjiptit, Emirateve të Bashkuara Arabe dhe Arabisë Saudite, si dhe Izraelit.