Kryeministri i Kosovës, Albin Kurti, ka thënë të hënën se është i shqetësuar me “krimet kundër civilëve dhe me rritjen e numrit të të vrarëve” pas sulmit të grupit militant Hamas në Izrael.

“I bashkohem thirrjes së aleatëve për ndërprerjen e menjëhershme të këtyre veprimeve dhe mbështetjen e të drejtës së Izraelit për t’u mbrojtur kundër terrorizmit dhe kërkesës për lirimin e menjëhershëm të pengjeve”, ka shkruar Kurti në rrjetin social “X”.

Izraeli ka deklaruar luftë formalisht të dielën, duke i dhënë ushtrisë dritën jeshile për “hapa të mëdhenj ushtarakë” për t’u hakmarrë ndaj Hamasit për sulmin befasues të së shtunës.

Izraeli ka bërë me dije se më shumë se 700 njerëz janë vrarë dhe 100 të tjerë janë rrëmbyer nga Hamasi.

Në Gaza, më shumë se 500 njerëz janë vrarë pas bombardimeve ajrore hakmarrëse nga Izraeli, sipas zyrtarëve palestinezë.

Izraeli ka lidhur marrëdhënie diplomatike me Kosovën në shkurt 2021, një vit pasi e ka njohur pavarësinë e saj të shpallur nga Prishtina më 2008.

Very concerned about the crimes against civilians & the rising death toll following the Hamas attacks in🇮🇱. I stand with our allies, urging an immediate halt to these acts, supporting Israel's right to self-defense against terrorism, & demanding the immediate release of hostages.

— Albin Kurti (@albinkurti) October 9, 2023