Pasi udhëheqësi çeçen Ramzan Kadyrov shprehu mbështetjen për palestinezët, Kremlini tha se Rusia mban lidhje diplomatike me të dy vendet e përfshira në konflikt.

“Ne kemi lidhje të gjata historike me palestinezët, ne vazhdojmë të nxisim kontaktet, përfshirë në nivel të lartë. Por në të njëjtën kohë, ne kemi marrëdhënie me shtetin e Izraelit, me të cilin kemi edhe shumë të përbashkëta, veçanërisht numrin e madh të bashkatdhetarëve tanë që banojnë në këtë shtet”, ka thënë zëdhënësi i Kremlinit, Dmitry Peskov.

“Prandaj, në këtë rast, ne mbajmë marrëdhënie me të dyja palët”, ka shtuar ai, shkruajnë mediat e huaja.

Ndërsa kur u pyet për natyrën e mbështetjes së Rusisë për palestinezët, Peskov tha se Moska është e angazhuar në mënyrë aktive në përpjekjet diplomatike dhe merr pjesë në formate të ndryshme duke kërkuar mënyra për një zgjidhje.

Peskov shtoi se datat për një vizitë të paralajmëruar të presidentit palestinez Mahmud Abbas në Moskë nuk janë finalizuar, por tha se vizita ishte planifikuar paraprakisht.

Ndryshe, Kadyrov kishte shprehur “mbështetje të plotë” për palestinezët dhe sugjeroi vendosjen e forcave të tij “paqebërëse” në një mision për të zgjidhur konfliktin në Izrael.

Kadyrov gjithashtu u bëri thirrje “vendeve islame dhe arabe që të bëjnë një deklaratë të përbashkët në mbrojtje të vëllezërve të tyre myslimanë” dhe fajësoi Perëndimin dhe Evropën për konfliktin në Izrael.