Kryetari i komunës së Preshevës, Shqiprim Arifi, duke folur për marrëdhëniet mes Shqipërisë dhe Kosovës, tha se kryeministri i Kosovës, Albin Kurti, ka ftohur marrëdhëniet mes vendeve, ndërsa theksoi se po luan rol përçarës te shqiptarët e Luginës së Preshevës.

Arifi nuk i ka kursyer kritikat ndaj Kurtit duke thënë se ka një qasje jo të mirë ndaj shqiptarëve të Luginës së Preshevës.

“Është një traditë e kryeministrit që të përçajë shqiptarët në Luginën e Preshevës. Ai tregon që do vazhdimësinë e përçarjes në Luginën e Preshevës. Këtu ka një kundërshtim pasi Kryeministria duhet të ketë parasysh interesin e përgjithshëm të pakicës shqiptare në Luginë të Preshevës. Kurti ka një qasje tjetër ndaj Greqisë, ai kalon më shumë kohë atje se sa në Shqipëri. Dhe unë pyes, përse Tirana anashkalohet nga Prishtina dhe nga Kurti vetë dhe përse ky angazhim në Greqi. Kur Mitsotakis e ka thënë vetë se nuk do ta njohë Kosovën”, ka thënë ai, në Abc news.al.

Gjithashtu, Arifi shtoi se Kurti ka injoruar kryenegociatorin e BE-së si dhe kryeministria ka injoruar mbështetjen e partnerëve evropianë.

Sa iu përket zgjedhjeve që do të mbahen në Serbi, ai shtoi se janë duke u përpjekur ta ndërtojnë listën e përbashkët për zgjedhjet parlamentare.

“Albin Kurti ka insistuar që të shkohet në mënyrë të ndarë, ai është duke përçarë shqiptarët e Preshevës, pra e theksoj përçarja në përgjithësi e ka emrin Albin Kurti i VV-së”, tha ai.

Kurti do t’i presë sot në takim liderët e partive shqiptare nga Lugina e Preshevës. Arifi ka deklaruar se nuk është ftuar në këtë takim.