Sevilla është eliminuar nga Liga e Kampionëve pas humbjes që pësoi 2-1 në udhëtim te Lensi. Por këtë ndeshje Sergio Ramos do ta mbajë gjatë në mendjen e tij, pasi ka arritur të thyej një rekord të madh në garën më të madhe evropiane për klube, Ligën e Kampionëve.

Qendërmbrojtësi spanjoll shënoi me një penallti të ekzekutuar me “Panenka” në këtë sfidë golin e vetëm të skuadrës së tij dhe u bë mbrojtësi me më shumë gola në historinë e Ligës së Kampioneve. Rekordi i mëparshëm ndahej mes tij, Gerard Piques dhe Roberto Carlosit me nga 16 gola, derisa tani Ramos është i vetëm në krye me 17 gola të realizuara.

Ky ishte goli i 138 në karrierë në ndeshje zyrtare për Sergio Ramos, një shifër e pabesueshme duke pasur parasysh që ai është qendërmbrojtës. Spanjolli konfirmohet si thuajse i pagabueshëm në gjuajtjet e penalltive, teksa ka realizuar 28 nga 30 të fundit që ka gjuajtur.

Ndërkohë, ka gabuar vetëm një herë nga 12 penalltitë që i ka ekzekutuar në stilin “Panenka”.