Franca, njësoj sikurse Gjermania është kundër ndryshimit të kufijve mes Prishtinës dhe Beogradit.

Burime të gazetës serbe “Veçernje Novosti” kanë thënë se gjatë konferencës së ambasadorëve të mbajtur javën e kaluar, në të cilën ka marrë pjesë edhe presidenti i Francës, Emannuel Macron, është shfaqur kundërshtimi për çfarëdo ndryshimi të kufijve apo të vijave administrative në rajon.

Qëndrimi Parisit në lidhje me këtë çështje është madje edhe më i fortë sesa qëndrimi i Berlinit, transmeton “Epoka e re”.

“Parisi zyrtar frikësohet se çfarëdo ndryshimi i kufijve mundet të shkaktojë reagime zinxhirore. Madje edhe nëse theksohet se e gjitha ka të bëjë vetëm me marrëdhëniet ndërmjet Prishtinës dhe Beogradit”, ka thënë një burim për gazetën serbe i cili ka qenë pjesëmarrës në këtë konferencë.

Kjo ka të bëjë, para së gjithash me situatën në të cilën Republika Serbe do të përpiqej ta ndjekë shembullin e veriut të Kosovës. Francezët rreptësishtë u qëndrojnë parimeve të Badinterit që kufijtë republikanë brenda ish-Jugosllavisë të shpallen kufij shtetërorë.

Marrëveshja përfundimtare për Kosovën, sipas gazetës, do të mundet të formulohej pikërisht në Francë, në margjinat e shënimit të 100-vjetorit të fitores së aleatëve në Luftën e Parë Botërore, që do të mbahet më 11 dhe 12 nëntor në Paris.