Një drejtues publik që ka spikatur për reformimin dhe modernizimin mbresëlënës të institucionit, orientimin konstant ndaj inovacionit në funksion të rritjes së cilësisë së shërbimit për qytetarët dhe shpejtësinë e integrimit të nënsektorit përkatës në kornizën e standardeve evropiane.

Kështu shkruan kryeministri i Shqipërisë, Edi Rama, për Blendi Gonxhen, drejtorin e Përgjithshëm të Shërbimeve të Transportit Rrugor – i cili tashmë pritet të marrë “bekimin” e presidentit për t’u bërë ministri më i ri në kabinetin qeveritar.

Gonxhes i është besuar një nga ministritë më të rëndësishme duke marrë në vëmendje shtrirjen e saj dhe epokën në të cilën jemi.

Ai është propozuar nga Rama që të drejtojë ministrinë e sapokrijuar, atë të Ekonomisë, Kulturës dhe Inovacionit.

Tre fusha të cilat – për kryeministrin – funksionojnë më së mirë së bashku.

Ministria e Gonxhes “ka zhdukur” atë të Kulturës së drejtuar nga Elva Margariti, dhe ka marrë një pjesë të Ministrisë së Financave dhe Ekonomisë (tashmë vetëm e Ekonomisë) e drejtuar nga Ervin Mete.

Vetë Gonxhe në drejtim e DPSHTRR-së ka sjellë transformim të dukshëm, nisur kjo me sistemin e godinave të reja e deri te eventet madhore, që u mbajtën për herë të parë në Shqipëri.

Me drejtimin e tij, automotoparku nuk është më një ëndërr, por një projekt që ka nisur punimet e fazës së parë në Elbasan.

Gonxhe dukshëm ka qenë një “i besuar” prej kohësh i Ramës.

Kjo pasi ai u emërua në vitin 1998 si shef i Kabinetit të Ministrit të Kulturës, Rinisë dhe Sporteve, asokohe Edi Rama.

Dy vite më pas ai e ndoqi Ramën në Bashkinë e Tiranës, ku u emërua nënkryetar.

Pas impenjimit si Këshilltar i Fondacionit “Rothschild” dhe “Packard” në vitin 2003, ai dedikua aktivitetit si një sipërmarrës në fushën e shërbimeve të lidhura me transportin për pasagjerë dhe automjetet në Greqi dhe Shqipëri, duke mbajtur edhe një profil publik aktiv ndër vite.

Më pas në 2015-n, pas marrjes së Bashkisë së Tiranës nga Erion Veliaj, Gonxhe u vendos si Drejtor i Përgjithshëm i Ndërmarrjes Nr. 1 të Punëtorëve të Qytetit.

Ai drejtoi gjithashtu Agjencinë e Parqeve dhe Rekreacionit të themeluar nga Bashkia Tiranë.

Ndërkaq që prej nëntorit të 2018-s ai u emërua nga vetë Rama për të drejtuar Drejtorinë e Përgjithshme të Shërbimeve të Transportit Rrugor, institucion në varësi të Ministrisë së Infrastrukturës dhe Energjisë.