Një 18-vjeçar ka ndërruar jetë në Qendrën Klinike Universitare të Kosovës (QKUK) të shtunën, pasi ditë më parë ishte rrahur brutalisht në Podujevë.

I njëjti tash e gjashtë ditë ishte duke u trajtuar në Mjekim Intensiv dhe kishte lëndime të rënda në kokë.

Kështu ka deklaruar për Telegrafin mjekja kujdestare në QKUK, Agreta Gashi.

“Pacienti i moshës 18-vjeçare ka qenë duke u trajtuar në Mjekim Intensiv tash e gjashtë ditë. Është pranuar si pasojë e lëndimeve që i ka marrë nga rrahja me mjet të fortë. Ka pasur lëndime të rënda në kokë. Është operuar në Klinikën e Neurokirurgjisë dhe sot ka ndërruar jetë”, ka deklaruar Gashi.

Për vdekjen e 18-vjeçarit kanë njoftuar edhe familjarë e tij. Sipas tyre, ai ishte goditur me veturë, e më pas ishte sulmuar me mjete të forta, duke i shkaktuar plagë të rënda.