Grupi militant, Shteti Islamik (IS) ka marrë përgjegjësinë për sulmin në një kishë katolike romake në Stamboll, ku është vrarë një person.

Sulmi ka ndodhur të dielën, më 28 janar, gjatë një shërbese.

Grupi ekstremist tha përmes një deklarate se ka kryer “sulm në një tubim të pafeve të krishterë gjatë një ceremonie të tyre politeiste” në Kishën e Shën Marisë në lagjen Bujukdere të Stambollit.

Ministri i Brendshëm i Turqisë, Ali Yerlikaya, ka thënë në orët e vona të së dielës se dy persona, që ai tha se ishin anëtarë të IS-it, janë arrestuar lidhur me sulmin. Sipas tij, njëri është nga Taxhikistani dhe tjetri nga Rusia.

Deklarata përmes së cilës IS-i ka marrë përgjegjësinë për sulmin është publikuar në Aamaq, krahun mediatik të IS-it, së bashku me fotografitë e dy persona të maskuar e të armatosur, të cilët, sipas grupit militant, kryen sulmin.

IS-i ka thënë se në sulm është vrarë një person dhe u plagos një tjetër, por autoritetet turke kanë deklaruar se një person është vrarë, por nuk ka të plagosur të tjerë.

Yerlikaya ka njoftuar se policia ka bastisur 30 lokacione dhe ka arrestuar 47 persona, si pjesë e hetimit për këtë sulm.

“Asnjëherë nuk do të tolerojmë ata që tentojnë të pengojnë paqen në shtetin tonë”, ka thënë ministri turk.

Më 3 janar, 25 anëtarë të dyshuar të IS-it janë arrestuar në mbarë Turqinë, nën dyshimet se kishin planifikuar sulme ndaj kishave dhe sinagoga, ka raportuar agjencia shtetërore e lajmeve, “Anadolu”.

IS-i në të kaluarën nuk kishte kryer sulme ndaj faltoreve në Turqi, por ka kryer një sërë sulmesh vdekjeprurëse në mbarë vendin, përfshirë edhe një sulm në një klub nate më 2017 në Stamboll, kur u vranë 39 persona. IS-i po ashtu ka kryer një sulm me bombë më 2015 në Ankara, duke vrarë 109 persona. /REL