![](https://www.epokaere.com/wp-content/uploads/2024/02/hendboll-1.jpeg)
Kosova U18 në Uzbekistan kërkon biletën për Botëror
Përfaqësuesja U18 e Kosovës në hendboll (vajzat) prej 28 shkurtit deri më 3 mars do të jetë në Tashkent të Uzbekistanit.
Në Tashkent, vashat e Kosovës do ta kërkojnë biletën për Kampionatin Botëror që mbahet në verë. Kosova U18 do të garojë në fazën ndërkontinentale të garës IHF Trophy.
Paraqitjen në fazën ndërkontinentale, Kosova e ka siguruar me triumf në IHF Trophy për zonën evropiane. Guadalupa, Guatemala, Kosova, Kaledonia e Re, Uzbekistani dhe Nigeria kërkojnë titullin e kampionit në grupmoshën e të rejave (U18). Kosova do të udhëtoj me synim të qartë – kualifikimin historik në Botëror.
Të kujtojmë që deri më tani ishin vetëm hendbollistët e Kosovës U21 që janë paraqitur në Kampionat Botëror, në Spanjë. Në sportet tjera ekipore, Kosova ende nuk është kualifikuar për në Kampionat Botëror.