Kurti: Serbia dëshiron ta lë të hapur opsion e invazionit në Kosovë

13 shkurt 2024 | 12:28

Kryeministri i Kosovës, Albin Kurti, ka thënë se liberalizimi i vizave që hyri në fuqi më 1 janar të këtij viti, ka rritur interesimin e serbëve të Kosovës për t’u pajisur me pasaporta si dhe konvertimin e suksesshëm në targa të Kosovës për vetura nga ato ilegale të Serbisë në mesin e pronarëve nga radhët e komunitetit serb në Kosovë.

Kurti këtë deklaratë e ka dhënë në panelin e diskutimit në Britaninë e Madhe të organizuar nga Instituti “Chatham House”,  në të cilin ishte njëri nga folësit kyç.

Temë e diskutimit ishin po ashtu sfidat e sigurisë me të cilat ballafaqohet rajoni, përkatësisht Ballkani Perëndimor.

Sipas komunikatës së dërguar për medie, kryeministri Kurti ka theksuar se aleanca e fortë e Serbisë me Rusinë nuk është vetëm rrezik teorik për Evropën dhe Ballkanin Perëndimor, por është rrezik real, me të cilin Kosova, por jo vetëm, përballet rregullisht.

Ai ka thënë se prezenca e Rusisë në Ballkan po rritet nëpërmjet Serbisë, dhe se në këtë kontekst një marrëveshje e nënshkruar ndërmjet Kosovës dhe Serbisë është më urgjente se kurrë. Mos nënshkrimin e deritanishëm të marrëveshjes, kryeministri e ka cilësuar si shenjë të qartë të mungesës së mirëbesimit, i cili është i nevojshëm për të pasur siguri ligjore dhe zbatim të asaj për çka palët janë pajtuar.

Për më tepër, kryeministri Kurti ka theksuar se refuzimi për të nënshkruar marrëveshjen nënkupton gjithashtu se Serbia dëshiron ta lë të hapur opsion e invazionit në Kosovë.

“Siguria e Kosovës dhe mbështetja për të është baza mbi të cilën vendi ynë mund të vazhdojë të rritet”, ka nënvizuar kryeministri Kurti, duke shtuar se Serbia, apo cilido aleat potencial i Rusisë, nuk mund ta mbajë rajonin larg BE-së sepse kjo do t’i shërbente vetëm Rusisë dhe përpjekjeve të saj për ta ndarë përsëri kontinentin.

Andaj, Kurti ka thënë se nga BE-ja duhet një qasje e cila nxitë përafrimin e vendeve të rajonit në Bashkimin Evropian (BE) mbi baza meritore, në vend se i gjithë rajoni të mbetet peng i një vendi të vetëm.

“Serbia me regjimin e saj autoritar po e mban të gjithë rajonin prapa”, ka thënë Kurti.

Lajme të sponsorizuara

Të fundit
Policia e Kosovës, gjegjësisht njësitet kufitare të Task Forcës -…