Dekani i Fakultetit Juridik, Avni Puka, ka thënë se suksesi i studentëve të këtij fakulteti në garën ndërkombëtare për drejtësi, është sukses gjithëkombëtar dhe inspirim për studentë e rinj.

Studentët e Fakultetit Juridik të UP-së të cilët përfaqësuan Universitetin e Prishtinës në garën “Willem C. Vis International Commercial Arbitration Moot”, arritën të dilnin në 3-shen më të mirë në botë. Kjo është gara më e madhe botërore në fushën e të drejtës ndërkombëtare komerciale dhe arbitrazhit.

Puka në emisionin e mëngjesit “Herët” në Tëvë 1, ka bërë të ditur se studentët e tyre marrin pjesë edhe në gara tjera ndërkombëtare.

Fakulteti Juridik i cili zakonisht ka pranuar numër të madh të aplikimeve për pranim nga studentët, sipas Pukës synohet të bëhet një shkollë juridike elitare, ku aty të shkojnë maturantët më të mirë të vendit.

“Këto vitet e fundit synimi ka qenë dhe është pjesë edhe e programit që të jemi një shkollë juridike elitare që në drejtësi të vijnë të studiojnë maturantët më të mirë dhe ne kemi arrit që në vitet e fundit që maturant më të mirë të vijnë të studiojnë në fakultetin juridik”, ka thënë Puka.

Ai ka thënë se garat në dy vitet e fundit janë pjesë e kurrikules.

Dea Fetiu, ka qenë pjesë e grupit të studentëve që u radhitën të tretën në garën ndërkombëtare për drejtësi ku morën pjesë 400 universitete.

Ajo duke folur për sfidat dhe përgatitjet për këtë garë, tregoi se 7 muaj janë përgatitur për garën.

Duke treguar për rastin të cilin e kanë pasur e që ka të bëjnë me një problem mes dy kompanive i cili ndodhet në arbitrazhin ndërkombëtar komercial për shkak të një transaksioni të gabuar, tha se ka një tendencë që në gara të tilla shtetet e vogla mos të avancohen shumë.

“Është një tendencë që shtetet e vogla mos me avansu shumë, kjo ka qenë prej seneve që na ka motivu më se shumti, e këna gëzuar një përkrahje mjaftë të madhe prej vendeve të rajonit”, tha ajo.

Nol Musa, pjesë e ekipit të studentëve në këtë garë, tha se kanë marrë mbështetje nga shumë universitete dhe se kanë dërguar mesazh që edhe universitetet më të vogla mund të arrijnë .

“Universiteti i Prishtinës dhe Kosova nuk njihet shumë, studentët nga Kenia kanë ardhe dhe na kanë mbështetë, edhe shumë universitetet të shteteve më të vogla dhe na thoshin urime për suksesin shpresoj se do të fitoni dhe të dërgoni mesazh se universitet me të vogla munden me arrit në këto gara”, ka thënë ai.

Pjesë e ekipit të që arritën këtë sukses ishin: Ariana Rexha Dea Fetiu, Morea Pula, Melisë Sejdiu, Nol Musa, Rea Hadri, si dhe trajnerëve: Prof. Donikë Qerimi, Ilir Hajraj dhe Art Sylaj.