Kryeministri i Kosovës, Albin Kurti, ka pritur të hënën në takim ish-kryeministrin e Britanisë së Madhe, Tony Blair, i cili ndodhet në Kosovë me rastin e 25 vjetorit të çlirimit të vendit tonë.

Kurti ka thënë se roli dhe kontributi i Blairit në çlirimin e Kosovës mbetet sa i rëndësishëm aq edhe jetik në pavarësinë dhe etapat shtetndërtuese të vendit tonë.

“‘Ne duhet të veprojmë: të shpëtojmë mijëra burra, gra dhe fëmijë të pafajshëm nga katastrofa humanitare, nga vdekja, barbarizmi dhe spastrimi etnik nga një diktaturë brutale; për të shpëtuar stabilitetin e rajonit të Ballkanit, ku e dimë se kaosi mund të përfshijë të gjithë Evropën’. Kjo ishte thirrja e atëherë kryeministrit britanik Tony Blair, më 23 mars 1999, e cila jehoi në Parlamentin e Britanisë së Madhe. Të nesërmen e 24 marsit 1999, NATO do të fillonte fushatën që ndali pikërisht spastrimin etnik të shqiptarëve në Kosovë, fushatë kjo që do të përfundonte më 10 qershor të po atij viti”.

“25 vjet më pas, ish-kryeministrin britanik Tony Blair, e patëm mysafir në Republikën e Kosovës. Roli dhe kontributi i tij në çlirimin e vendit tonë dhe sigurimin e paqes, bashkë dhe me partnerët e aleatët tanë, mbetet sa i rëndësishëm aq edhe jetik në pavarësinë dhe etapat shtetndërtuese të vendit tonë. Çlirimi dhe liria në Kosovë, solli fundin e luftërave në Ballkan të viteve të ’90-a, dhe fillimin e një rrugëtimi të demokracisë, progresit dhe zhvillimit. E falënderova përzemërsisht mikun e vendit tonë Tony Blair, për mbështetjen e palëkundur asokohe dhe lidhjen e përjetshme të krijuar mes popullit tonë dhe popullit britanik”, ka shkruar Kurti në “Facebook”.