Ministri izraelit i Mbrojtjes, Yoav Gallant është nisur për në Uashington të dielën për të diskutuar fazën tjetër të luftës së Gazës dhe përshkallëzimin e armiqësive në kufirin me Libanin, ku shkëmbimet e zjarrit me Hezbollahun kanë ngjallur frikën e një konflikti më të gjerë.

Hezbollahu i mbështetur nga Irani ka shkëmbyer zjarrin me Izraelin që kur shpërtheu lufta në Gaza më shumë se tetë muaj më parë. Grupi ka thënë se nuk do të ndalet derisa të ketë një armëpushim në Gaza.

“Ne jemi të përgatitur për çdo veprim që mund të kërkohet në Gaza, Liban dhe në më shumë zona”, tha Gallant në një deklaratë përpara se të nisej për në Uashington, ku tha se do të takohet me homologun e tij Lloyd Austin dhe Sekretarin e Shtetit Antony Blinken.

Më herët në qershor, Hezbollahu shënjestroi qytete dhe objekte ushtarake izraelite me breshëritë më të mëdha të raketave dhe dronëve në armiqësitë deri tani, pasi një sulm izraelit vrau komandantin më të lartë të Hezbollahut deri më tani.

I dërguari i ShBA-së, Amos Hochstein vizitoi Izraelin dhe Libanin javën e kaluar në një përpjekje për të qetësuar tensionet, mes një rritjeje të zjarrit ndërkufitar dhe një përshkallëzimi në retorikë nga të dyja palët.

Disa zyrtarë izraelitë e kanë lidhur shtytjen e vazhdueshme izraelite në Rafah, zonën jugore të Gazës, ku thotë se po synon batalionet e fundit të grupit militant islamik Hamas, me një fokus të mundshëm në Liban.

Gallant duket se ka bërë të njëjtën lidhje në deklaratën e tij.

“Tranzicioni në fazën C në Gaza është i një rëndësie të madhe. Këtë tranzicion do ta diskutoj me zyrtarë amerikanë se si mund të mundësojë gjëra shtesë dhe e di që do të arrijmë bashkëpunim të ngushtë me ShBA-në edhe për këtë çështje”, tha Gallant, raporton “Reuters”.

Zvogëlimi i operacioneve në Gaza do të lironte forcat për të luftuar Hezbollahun, nëse Izraeli do të fillonte një ofensivë tokësore ose do të shtonte bombardimet e tij ajrore.

Zyrtarët e kanë përshkruar fazën e tretë dhe të fundit të ofensivës izraelite në Gaza si mbyllje e luftimeve ndërsa shtojnë përpjekjet për të stabilizuar një sundim post-Hamas dhe për të filluar rindërtimin në enklavë, pjesa më e madhe e së cilës është shkatërruar.