Dëshmitari Bislim Zyrapi gjatë dëshmisë së tij në Hagë, ka pohuar se është ende i qëndrimit që pas krijimit të Qeverisë së Përkohshme, aspektet ushtarake kanë vijuar që të mbesin pjesë e UÇK -së.

Një gjë të tillë dëshmitari e kishte thënë edhe për Zyrën e Prokurorit të Specializuar, gjë të cilën e ka pohuar edhe të hënën ë sallën e gjyqit duke iu përgjigjur pyetjeve të mbrojtjes së Thaçit, përmes avokatit Luka Mishetiq, raporton “Betimi për Drejtësi”.

Po ashtu, ai ka pohuar se qëndron fakti ashtu siç e kishte thënë që kur Fatmir Limaj kaloi në Ministrinë e Mbrojtjes, nuk e kishte më në dorë komandën e policisë ushtarake, sepse kjo njësi vijoi të qëndronte nën urdhrat e UÇK-së.

Zyrapi ka pohuar se deri sa është bartur në Qeverinë e Përkohshme, Sokol Dobruna i ka raportuar komandantit të Përgjithshëm të UÇK-së, Agim Çekut.

“Po, deri sa nuk është bartur në Qeverinë e përkohshme”, ka thënë Zyrapi.

Pas funksionit të tij në UÇK, dëshmitari ka thënë se ka shkuar të punonte si asistent në Ministrinë e Mbrojtjes e që më pas ka deklaruar se ky dikaster bënte pjesë në Qeverinë e Përkohshme dhe jo në UÇK.

“Ashtu është”, ka thënë dëshmitari, duke shtuar se nuk mund të emërohej në këtë pozitë nga komandanti i ri i UÇK-së, Agim Ceku pasi Qeveria e përkohshme nuk ishte nën pushtetin e tij.

Në një përgjigje për ZPS-në se a bënte kontroll Qeveria e përkohshme mbi UÇK-në, dëshmitari kishte thënë se me rregulla do të duhej të bëhej një gjë e tillë.

“Përgjigja juaj është kjo: Sipas rregullave kështu duhet të kishte qenë por nuk e di se deri ku kanë arrit me e bë një gjë të tillë”, ka thënë Luka Mishetiq duke e lexuar përgjigjën e dëshmitarit për ZPS-në.

Ndërsa, në përgjigjen e tanishme dëshmitari, ka thënë se shumë problem ka qenë që Shtabi i Përgjithshëm të ketë ndikim mbi njësitë e lëre më Qeveria e Përkohshme.

“Nuk është çështja vetëm e dyshimit se edhe mundësia nuk është lejuar që kanë mundur në atë kohë që Qeveria e Përkohshme të ketë një ndikim. Shumë problem ka qenë që Shtabi i Përgjithshëm të ketë ndikim në njësitë e leje më Qeveria e Përkohshme, e cila ishte vetëm në fillim të formimit për arsye të ofensivave të rrepta që ishin, lëvizjet e forcave të tona dhe normalisht  mundësia e komunikimit në njësitë më poshtë nuk ka mundur të jenë as nga Shtabi, po as nuk ka mundur të ketë ndikim as Qeveria e Përkohshme në atë kohë pasi flasim për periudhën kohën prej prill-maj në atë drejtim. Faktikisht prillin kur unë kam qenë brenda”, ka thënë Zyrapi.

Dëshmitari ka thënë se nuk është në dijeni për përbërjen e plotë të anëtarëve të Qeverisë së Përkohshme por vetëm një pjese të tyre. Ai ka thënë se ishte në dijeni se në formacionin e saj kishte nga parti të ndryshme politike.

“Nuk ishin me një vend. Ishin të shpërndarë në shumë vende, disa në Kosovë disa në Shqipëri, disa jashtë. Po anëtarët e Qeverisë së përkohshme në atë kohë, po foli për periudhën në prill, kanë qenë pak ata që kanë qenë brenda, grup shumë i vogël”, ka thënë Zyrapi kur është pyetur se ku qëndronin anëtarët e Qeverisë së Përkohshme.