“Si nga pikëpamja njerëzore e miqësore, ashtu edhe nga pikëpamja institucionale, shpreh keqardhje të thellë për dorëheqjen e papritur të znj. Lindita Nikolla nga funksioni i saj i kryetares së Kuvendit të Shqipërisë”, kështu ka shkruar kryetari i Kuvendit të Kosovës, Glauk Konjufca, me rastin e dorëheqjes së Nikollës nga posti i kryeparlamentares së Shqipërisë.

Ai ka shkruar në Facebook se bashkëpunimi ka qenë i shkëlqyer dhe do të shërbejë si referencë e një kriteri shumë të lartë të vendosur në lidhje me raportet tona institucionale.

“Ky kriter nuk do të mund të kthehet më pas, por vetëm të rritet dhe thellohet më shumë. Përvoja, komunikimi, profesionalizmi dhe korrektësia e znj. Lindita Nikolla ishin të dhëna të rëndësishme të cilat na mundësuan një thellim të raporteve tona, ashtu siç i ka hije institucioneve tona legjislative të dy shteteve tona vëllazërore”.

“Gjatë përpjekjeve tona të përbashkëta arritëm të organizojmë për herë të parë seancën e përbashkët mes parlamenteve tona, u rrit në mënyrë të shkëlqyeshme puna mes komisioneve parlamentare, e ngushtuam edhe më tej largësinë mes nesh përmes organizimeve të përbashkëta sportive dhe kulturore, patëm në nivel të lartë gatishmërinë për bashkëpunim shembullor në aspektet honorifike dhe solemne, ashtu siç edhe në ato të frymës së harmonizimit të kornizës legjislative në dobi të popullit tonë dhe qytetarëve tanë”, ka shkruar Konjufca.

“Homologes, mikes, motrës sime të dashur Lindita Nikolla, i uroj nga zemra shëndet dhe suksese në angazhimet e saj të mëpasshme, të cilat jam i bindur se do t’i vijojë me profesionalizëm të lartë dhe i uroj shëndet të plotë”, ka theksuar ai.

“Jam i lumtur që pata mundësinë të punoj me znj. Nikolla dhe dua ta falënderoj që me punën dhe qasjen e saj vendosi një obligim të domosdoshëm për çdo kryetar kuvendi të ardhshëm në vendet tona, atë të bashkëpunimit të pakursyer, me dashamirësi, mirëbesim dhe angazhim maksimal”, ka deklaruar Konjufca.