Presidenti i FFK-së, Agim Ademi, ka bërë sot hapjen e kampit tradicional para fillimit të edicionit të ri futbollistik, për referët e futbollit të Kosovës, me pjesëmarrjen e instruktorëve të huaj.

“Kënaqësi e veçantë të mirëpresim në Kosovë emrat e shquar të drejtësisë në futbollin botëror: Alan Snoddy – instruktor teknik i FIFA-së; Simon Breivik – instruktor i fitnesit i FIFA-së dhe trajner i fitnesit të gjyqtarëve të Premier Ligës Angleze; dhe Alexandru Deaconu – përgjegjës i Konventës për Kosovën në UEFA dhe instruktor teknik i UEFA-së”, ka shkruar presidenti Ademi në Facebook.

Ai ka treguar se gjatë kampit 4-ditor, referët elitarë dhe të kategorisë së parë do të përfitojnë nga analiza e vendimeve dhe veprimeve të referëve, diskutime rreth rregullave të lojës dhe testime fizike.

“Falenderojmë mentorët e dërguar nga FIFA dhe UEFA për mbështetje të çmuar në avancimin e referëve tanë dhe për përkushtimin e tyre në zhvillimin e sektorit të referimit në futbollin e Kosovës. Ky kamp është një hap i rëndësishëm drejt thellimit të bashkëpunimit dhe ngritjes së referëve jo vetëm në gjykimin e lojërave por edhe në rritjen e numrit të përfaqësimit të vendit me steme të FIFA-së”.

“U dëshiroj suksese të gjithëve në këtë kamp, duke garantuar një gjykim të drejtë dhe me integritet të lartë për të gjitha klubet. Vazhdojmë me krenari e përgjegjësi”, ka shkruar Ademi.