Ministri i Punëve të Brendshme, Xhelal Sveçla, është treguar i prerë se nuk do të heqë dorë për çështjen e hapjes së Urës së Ibrit, dhe se kjo çështje nuk do të jetë temë dialogu në Bruksel.

Ai është parë duke e inspektuar sërish Urën të mërkurën, me ministrin e Administrimit të Pushtetit Lokal Elbert Krasniqi dhe punëtorët e kompanisë së kontraktuar për t’i kryer inspektimet.

“Inspektimi është në dy faza, jemi në proces, po veprojmë sipas planit të cilin ne po e ndajmë me bashkëpunëtorët tanë dhe s’po shoh asgjë të jashtëzakonshme. Çështja është e mbyllur, qysh më 2016. Nuk është çështja e dialogut fare. Është çështje e të drejtës për t’u hapur dhe e një vendimi që është tashmë publik”, ka thënë Sveçla për “Express”.