Misioni i NATO-s në Kosovë – KFOR-i, ka reaguar pas protestës së serbëve në veri të vendit, të cilën e ka quajtur paqësore.

KFOR-i ka theksuar se trupat e tyre ishin në terren dhe kryen patrulla në zonat përreth për të ofruar një mjedis të sigurt, teksa thanë se protesta vazhdoi pa asnjë “shqetësim të sigurisë”.

“KFOR-i vazhdon të zbatojë mandatin e tij të OKB-së, për të mirën e të gjithë njerëzve dhe komuniteteve që jetojnë në Kosovë, në çdo kohë dhe në mënyrë të paanshme. KFOR-i vepron si i treti reagues i sigurisë, në koordinim të ngushtë me Policinë e Kosovës dhe me EULEX-in, respektivisht si reagues i parë dhe i dytë i sigurisë”, ka njoftuar KFOR-i.

Të mërkurën, serbët e veriut kanë protestuar në lidhje me paralajmërimet e qeverisë për hapjen e Urës së Ibrit në Mitrovicë të Veriut.