![](https://www.epokaere.com/wp-content/uploads/2024/08/IMG_4259.png)
Arrestohet shtetasi i Kosovës në Kroaci, shkaktoi aksident me fatalitet
Një shtetas i Kosovës, i lindur më 1984, është dërguar në paraburgim në Dubrovnik më 20 gusht 2024, për shkak të dyshimit se ka kryer veprën penale të shkaktimit të një aksidenti në trafik, i cili rezultoi me fatalitet.
Siç njofton Zyra e Prokurorit të Shtetit të Kroacisë, të martën (20 gusht), në Prokurorinë Komunale të Shtetit në Dubrovnik është sjellë një shtetas i Republikës së Kosovës (i lindur më 1984), nën dyshimin se ka kryer veprën penale të shkaktimit të një aksidenti trafiku në komunikacionin rrugor, raporton Klankosova.tv.
“Ekziston dyshimi i bazuar se më datë 15.08.2024, rreth orës 05:50, 40-vjeçari ka qenë duke drejtuar veturën Renault Laguna në afërsi të qytetit Soline në drejtim të Dubrovnikut, ndërsa nuk ka lëvizur në shiritin e tij të qarkullimit, por ka kthyer mjetin në të majtë dhe ka kaluar në korsinë e kundërt dhe ka goditur veturën e pasagjerëve e cila ka qenë në lëvizje nga ana e kundërt dhe e drejtuar nga shtetasi i Republikës së Kroacisë (1979). Drejtuesi i atij mjeti të pasagjerëve ka ndërruar jetë në vendngjarje për shkak të plagëve të shumta, ndërsa pasagjerët në atë mjet (një 48-vjeçar dhe një 45-vjeçare, shtetas të Republikës së Polonisë) kanë pësuar lëndime të rënda fizike. Në aksident trafiku janë lënduar rëndë edhe pasagjerët (shtetasja 42 vjeçare e Republikës së Kosovës, shtetasja 11 vjeçare e Republikës së Kosovës) në veturën e drejtuar nga i dyshuari 40 vjeçar”, ka njoftuar Zyra e Prokurorit të Shtetit të Kroacisë.
Më 20 gusht 2024, Prokuroria Komunale e Shtetit në Dubrovnik i propozoi gjyqtarit hetues të Gjykatës së Qarkut të Dubrovnikut që të dyshuarit 40-vjeçar t’i caktohet masa e paraburgimit, të cilën kërkesë gjyqtari hetues e ka pranuar dhe i ka caktuar masën e paraburgimit.