![](https://www.epokaere.com/wp-content/uploads/2024/08/u17.png)
Kosova sërish e mposhti Malin e Zi
Kosova ka mposhtur Malin e Zi edhe në miqësoren e dytë me rezultat bindës, 6-0. “Dardanet” të motivuara nga fitorja e parë, dhanë maksimumin në fushë duke siguruar rezultat tejet pozitiv.
Të përzgjedhurat e Sanije Krasniqit edhe në këtë ndeshje dominuan qysh nga fillimi, derisa rrjetën e portës kundërshtare arritën ta tundin në minutën e 22-të, kur shënoi Krenare Kelmendi për 1:0. Misioni i “dardaneve” nuk përfundoi me kaq, pasi të përkushtuara dhe të etura për rezultat më të thellë, shënuan sërish në minutën e 30-të kur nga gjuajtja e lirë për 2:0 realizoi Olsa Maqastena.
Pesë minuta më vonë porta e kundërshtarit u pushtua sërish. Agnesa Krasniqi shënoi golin e fundit të pjesës së parë, e cila përfundoi me rezultat 3:0. Performancë të njëjtë Kosova pati edhe në pjesën e dytë.
Në minutën e 69-të Loela Ahmeti realizoi golin e katërt. Goli i pestë me radhë erdhi nga penalltia ku saktësia e Bora Bajramit i shtoi motivin skuadrës, e veçanërisht Altuna Francajt e cila vetëm gjashtë minuta më vonë realizoi golin e 6-të njëherit të fundit për këtë takim. Kosova në dy miqësoret kundër Malit të Zi shënoi 11 gola derisa nuk pranoi as edhe një nga kundërshtari. Kjo përgatitje dëshmon që “dardanet” janë gati për ndeshjet kualifikuese të cilat zhvillohen në fund të tetorit dhe në fillim të nëntorit në Shqipëri.