Samiti i NATO-s do të zhvillohet në Tiranë në vitin 2027. Kështu ka bërë me dije kryeministri shqiptar, Edi Rama gjatë fjalës së tij në Konferencën e Ambasadorëve që është hapur të hënën në Tiranë, ngjarje kjo e cila do të zgjasë tri ditë.

Gjithashtu, Rama ka bërë me dije se Shqipëria do të presë 44 liderë evropianë në vitin 2025 në Samitin e Komunitetit Politik Evropian.

“Shqipëria vitin tjetër do të mikpresë liderët e 44 vendeve evropiane nga Britania në Ukrainë apo nga Suedia e Norvegjia në Turqi vitin e ardhshëm në Samitin e Komunitetit Politik Evropian. Sa e rëndësishme është për ne që jemi një vend i vogël që të përfaqësohemi me volumin më të lartë të ambicies dhe aftësisë për të qenë të respektueshëm, na jep mundësinë që ne të jemi mikpritës i Samitit të NATO-s vitin 2027, as që mund të imagjinoheshin vite më parë”, ka thënë Rama.