![](https://www.epokaere.com/wp-content/uploads/2024/08/zhiti.jpg)
Zhitia: Avokatë dhe prokurorë kanë shkoqitë fjali nga libri im, të cilat në opinion kanë përcjellë një mesazh të gabuar
Dëshmitari Skender Zhita gjatë dëshmisë së tij në Hagë, ka thënë se avokatë dhe prokurorë nga Dhomat e Specializuara të Kosovës (DhSK), kanë shkoqitur fjalë dhe fjali nga libri i tij, të cilat në opinion më pas kanë përcjellë mesazh të gabuar.
Këtë deklaratë, dëshmitari e ka bërë pasi është pyetur nga prokurorja Silvia D’Ascoli se a e ka ribotuar ndonjëherë librin e tij, raporton “Betimi për Drejtësi“.
“Po, e kam ribotuar në vitin 2023 pa ndryshime. Arsyeja e ribotimit është fakti që nga kjo dhomë, avokatë, por edhe prokurorë kanë shkoqitë fjalë dhe e fjali nga tërësia e librit tim, të cilat në opinion e kanë përcjellë një mesazh të gabuar”, ka thënë dëshmitari.
Përpara kësaj, Zhitia është pyetur për një pjesë të librit ku përshkruhen ngjarje në Zonën Operative të Llapit nga 24 marsi 1999 deri më 1 maj të vitit 1999.
Ai ka pohuar se është i saktë informacioni që e ka pasqyruar në libër, ku kishte treguar se pas fillimit të bombardimeve të NATO-s, në Zonën Operative të Llapit kishte filluar ofensiva serbe dhe se Serbia kishte filluar me planin “Patkoi” për dëbimin e shqiptarëve.
“Po, ato të cilat kishin për qëllim dëbimin e popullatës civile nga rajoni i Zonës Operative të Llapit, por është një operacion i bazuar në planin ‘Patkoi’ të Serbisë në atë kohë i cili filloi me fillimin e bombardimeve të NATO-s dhe ky operacion filloi nga pjesa më veriore e Kosovës, respektivisht nga zona Operative e Llapit. Kështu që u mobilizuan të gjitha njësitë në atë kohë që t’i dalin në ndihmë popullatës për t’u evakuuar dhe larguar nga regjionet të cilat ishin me të rrezikuara. Pra, tek ‘Patkoi’ kemi çka të shtojmë dhe të themi”, ka thënë Zhitia.
Ndryshe, pranuan në prova materiale faqet e librit të dëshmitarit për të cilat ai u mor në pyetje deri tash. Këto faqe të librit u klasifikuan si prova publike.