![](https://www.epokaere.com/wp-content/uploads/2023/02/Verstappen.jpg)
Verstappen i zhgënjyer nga gara në Holandë: Situatë jo e mirë, por nuk ka vend për panik
Gara e fundit e Formula 1 në Holandë ishte një zhgënjim për pilotin vendës Max Verstappen, që u “mjaftua” me vendin e dytë. Por problem më i madh ishte se ai e mbylli garën 20 sekonda pas Lando Norris me McLaren.
Kjo diferencë kaq e madhe nuk i pëlqen Verstappenit, që ka ende 70 pikë avantazh ndaj britanikut në klasifikimin e përgjithshëm. “Unë mendoj se kjo ishte thjesht një fundjavë e keqe në përgjithësi”, u shpreh Verstappen. “Nuk më pëlqen kjo diferencën me Norris, ndaj duhet të kuptojmë pse. Garat e fundit nuk kanë qenë fantastike. Kjo situatë është paksa alarmante, por ne e dimë se nuk duhet të kemi panik”, tha më tej 3 herë kampioni i botës.
“Ne duhet të përpiqemi të përmirësojmë situatën. Dhe kjo është ajo për të cilën ne po punojmë edhe pse Formula 1 është shumë e komplikuar”, ka thënë më tej holandezi i Red Bull Racing, që nuk fiton prej 5 garash. Verstappeni shpreson të rigjejë fitoren në pistën e Monza, ku dhe ka disa risi: “Në Monza do të ketë asfalt të ri, bordura të reja dhe gjithashtu një modifikim në kthesën e parë të dyfishtë. E dimë që kemi shumë punë për të bërë”.