![](https://www.epokaere.com/wp-content/uploads/2024/08/Svecla-1.jpg)
Minatori e cilëson presion vizitën e Sveçlës në ‘Trepçë’
Ushtruesi i detyrës së kryeshefit të “Trepçës”, Faton Ahmeti dje ka nënshkruar një vendim me të cilin ka shpallur gjendje të jashtëzakonshme në këtë ndërmarrje publike.
Shkak i kësaj, sipas menaxhmentit është bojkoti i punës nga minatorët nga data 10.07.2024 deri më 15.08.2024.
Në vendim thuhet se menaxhmenti synon rikuperimin e gjendjes së krijuar përkatësisht rritjen e sasisë së koncentratit të humbur përgjatë grevës, me ç’rast pushimet e planifikuara gjatë muajve shtator, tetor dhe nëntor, pritet të anulohen.
Në lidhje me këtë, minatori Miftar Mehmeti, ka thënë se ky nuk është një vendim i duhur pasi tregon raportet në mes të menaxhmentit dhe punëtorëve.
Në emisionin “Rreth e Rrotull”, Mehmeti ka thënë se ky vendim bie ndesh me ligjin.
“Nuk është një gjë e mirë nga ana e menaxhmentit në raport me punëtorët. Ka raste kur pushimin e kanë planifikuar për çështje familjare, e kanë lënë në një datë të caktuar. Me anë të këtij vendimi po bien ndesh me ligjin”, ka deklaruar Miftari.
Vizitën e ministrit të Punëve të Brendshme, Xhelal Sveçla në këtë ndërmarrje, Mehmeti e ka cilësuar si një lloj “presioni”.
“Në atë ndërrim nuk kam qenë prezent, nuk e di sa është e arsyeshme një ministër i punëve të brendshme të marrë pjesë te punëtorët, është një lloj presioni. Kërkesat tona janë evidente që moti si përmirësimi i kushteve të punës. Kërkojmë nga qeveria aktuale dhe ajo që do vijë në vijim, që të investojnë në këtë ndërmarrje pasi punojmë në kushte të mjerueshme”, ka thënë Mehmeti.