Ministrja e Drejtësisë, Albulena Haxhiu, ka deklaruar se janë bërë përditësimet e nevojshme në Ligjin për byronë e pasurisë së pajustifikueshme, i rrëzuar nga Gjykata Kushtetuese javë më parë.

Haxhiu  në një konferencë për medie ka bërë me dije se janë adresuar çështjet të cilat ishin në kundërshtim me Kushtetuesen.

“Çështja e parë, e retroaktivitetit të ligjit ka qenë temë e diskutuar dhe komplekse. Ka ngjallur debate. Nuk e ka kundërshtuar parimisht, duke lejuar aplikimin e tij kur është në interesin publik, megjithatë, sipas gjykatës, shtrirja e gjatë kohore mund të krijojë sfida për palët e përfshira, duke vendosur ato në pamundësi objektive për të siguruar prova për prejardhjen e pasurisë së tyre. Këtë koncept të pamundësisë objektive e ka adresuar aktgjykimi i Gjykatës Kushtetuese. Periudhat kohore për verifikimin e pasurisë. Ndryshimet e reja sigurojnë që periudha të lidhet vetëm me periudhën kur zyrtari ka qenë në funksion, duke lejuar përjashtimisht zgjatjen e verifikimit për pesë vite pas mandatit. Kjo masë siguron një balancë të drejtë”, ka thënë Haxhiu.

Më tutje, ajo ka thënë se “Komisioni Mbikëqyrës dhe ndarja e pushteteve, Kushtetuesja ka konfirmuar se kompetencat e tij nuk janë antikushtetuese, por ka identifikuar nevojën për ndryshimin e nevojës së tij për të respektuar ndarjen e pushteteve”.

“Versioni me ndryshime ka rikonstruktuar Komisionit Mbikëqyrës, duke përfshirë tre anëtarë të Kuvendit, pra drejtorin e Agjencisë për Parandalimin e Korrupsionit dhe drejtorin e Inteligjencës Financiare”, ka thënë Haxhiu.

Sa i përket çështjet në lidhje me deklaratat financiare, Haxhiu para medieve ka deklaruar se janë në pritje të komenteve nga Ministria e Financave dhe zyra e kryeministrit.

Sipas saj, të njëjtat do të merren brenda kësaj jave dhe do të procedohen menjëherë në Qeverinë e Kosovës, e më pas në Kuvend.